羅君左（斌仔）終於脫離病魔煎熬離大家而去；早前因病去世嘅斌仔噚日喺世界殯儀館出殯，一班識於微時嘅朋友都專程到場送佢最後一程，當中包括有廖安麗、溫柳媚、車淑梅、葉尚華同艾威等等，送別故友，個個都難免露出哀傷嘅神情。
志偉趕唔切扶靈
好友廖安麗同溫柳媚回憶起斌仔嘅一點一滴都忍唔住喊咗出嚟，場面感人。之後由斌仔嘅姪仔捧住佢嘅遺照出殯，且由斌仔8位好友扶靈，原先曾志偉都喺扶靈名單入面，但因為佢前一晚拍賀歲片《我愛HK開心萬歲》拍通宵，結果佢都趕唔切出現。
屋企人低調現身
完成晒大殮儀式，斌仔嘅遺體送去沙田富山火葬場火化，斌仔嘅屋企人都低調現身，冇接受訪問。另外曾經傳同斌仔不和嘅姪女Cally亦有到場，但就戴住黑超出現。問到斌仔助手Sin，究竟斌仔同Cally係咪不和？Cally係咪一直都冇探過斌仔呢？Sin只係話：「冇人知究竟佢有冇探，但係就冇不和。」
火葬一刻，廖安麗透露當㩒掣時大家都好唔捨得而喊咗出嚟，至於有乜陪葬物？廖安麗話：「有斌仔扮肥姐（沈殿霞）時着過嘅兩套衫，連內衣都有埋，等佢去到另一個世界都可以繼續扮嘢。」
