前幾日，滙豐大肆宣傳話，推出平通全港嘅強積金計劃。敏妮即刻同慳妹研究係咪真係咁抵。雖然積金半自由行一再延遲，但仲有唔少朋友有保留賬戶，可以自己揀積金服務供應商。
滙豐新推出嘅強積金計劃，其中兩款可供選擇基金，一款係追蹤恒生H股指數，另一款係追蹤恒生指數，雖然收足基金管理費，但只係幫你去買市場上嘅ETF（交易所買賣基金），恒生H股指數基金就係收咗你嘅強積金供款之後，拎去買恒生H股ETF（2828），至於恒指基金就買恒生指數ETF（2833）。
金融產品自己都買到
咁做同月供兩隻ETF有乜分別呢？有！經強積金供，咪就係收多你份基金管理費囉！本來敏妮想用喺中銀香港（2388）月供股票嚟做例子，貪佢可以用信用卡供款，賺積分換超市coupon。不過check清楚發現，中銀冇得供上述兩隻ETF。無謂畀人challenge，所以假設喺恒生銀行（011）供上述兩隻ETF，每月手續費最少50蚊，或投資額嘅0.25%，以價高者為準。手續費已經包括佣金、印花稅、交易徵費、存倉費、代理人服務費等。簡單嚟講，如果月供2000蚊，扣起50蚊手續費後，剩低嘅1950蚊，就會全部買入揀定嗰隻ETF。
至於透過強積金供ETF，滙豐收嗰筆基金管理費只係包信託人、託管人、行政管理人費用同投資管理費，除此以外，基金仲有其他收費同開支，包括維持基金，同核數及專業費用、補償基金徵費、牌照費、彌償保險費等嘅運作開支；仲未包基金買入ETF時要支付嘅佣金、交易徵費同印花稅等。
明知畀多咗，但政府擺明要益積金服務供應商，焗你透過中介人嚟買一啲自己都可以輕易買到嘅金融產品，打工仔只能就範。有人會話，供應商收得管理費，會幫你監察勞資雙方嘅積金供款，但強積金成立至今，係咪冇老闆走數呢？心照。
溫敏妮
http://wanmanli.com/blogs/