年尾流流，除咗乜乜十大揭盅，打工仔更關心嘅，就係來年到底加幾多人工！截至噚日為止，華華覺得新地（016）員工應該最開心，事關佢哋出年嘅加薪幅度，應該一定多過4%，而且仲高過同行㖭！
噚日新地股東會後，由3變2嘅郭氏兄弟照例會一會傳媒，傳媒除咗照例問佢哋啲家事（照例係無答喇！），亦照例問佢哋出年加幾多人工畀班伙記，三佬郭炳聯話，佢會先調查行業之間嘅情況，肯定會高過同行嘅平均；加上通脹又「相當」，明年通脹又高過今年……
關愛基金唔影響其他捐款
咦，即係加幾多呢？人哋恒地（012）話會加4%喎！郭炳聯回應話：「佢都係我哋調查嘅公司之一！」查實講咩多過行業平均唧，實行同四叔睇齊好過啦！需知道你嗰啲家庭風波絕對唔小兒科過四叔嗰家，班伙記應該都做多咗好多額外嘢，咁你哋又話「以心建家」，一於豪啲加多過四叔嗰4%啦！
講講吓又講到關愛基金，新地作為頭嗰批撐呢個基金嘅富商，以「新鴻基地產郭氏基金」名義捐咗4億，大家都關心會唔會因為掛住關照唐唐而削減其他方面嘅捐款，二佬郭炳江就派定心丸，話明唔會減少！
郭炳江：買唔買樓自己諗
至於話政府出招打擊樓市炒賣活動，咁家係咪買樓嘅好時機？郭炳江話：「自己諗，冇梗話係嘅……」又答得幾醒喎！
李華華
mailto:[email protected]