申亞處於彌留狀態，自從民建聯宣佈唔支持後，其實形同將申亞判處極刑，家陣只係等拔喉。事到如今，相信係全港最熱心申亞嘅港協暨奧委會揸fit人霍震霆，都已經擺出無能為力姿態，反而官府卻大鑼大鼓起錨出擊游說議員，一冷一熱，好奇怪。
代表或中間人枱底交易
知情人士同八方講，小霍在呢個時間轉趨低調，係因為申亞前路充滿挑戰，就算香港民意支持去馬申亞，日後亞奧理事會投票時，如何向各成員國拉票才考工夫。據講一名本地體育界權威人士曾私下向人表示，申辦國際性大賽牽涉政治，而政治同金錢係雙生兒，因此各國代表或中間人有枱底交易幾乎係公開秘密，2018、2022年世界盃主辦權揭盅前夕爆出賄賂醜聞，只係體壇腐敗冰山一角。
世界盃係一盤大生意，有人出蠱惑好正常，亞運都咁值錢？須知道成功申辦只係食大茶飯序幕，攞到申辦權嘅城市，大事慶祝之後隨之而來就係大興土木，幾年前澳門搞東亞運要興建多個場館，工程後來被揭發涉及區文龍貪污案，可見體育館、運動場、游泳池除咗係誕生獎牌嘅英雄地，亦係滋生舞弊營私嘅犯罪溫床。
小霍唔係財神，唔會派錢帶挈人發財，難怪對申亞由熱轉冷，至於點解高官忽然肉緊呢？無非係唔想為申亞不成孭鑊，現在表現得越落力，日後雖敗猶榮就更加理直氣壯，只怕民意出乎意料之外逆轉，屆時騎虎難下，被迫上馬就尷尬了。
曾憲梓鬧民建聯唔愛港
坐輪椅傳遞奧運聖火嘅前人大曾憲梓，對大型運動會可能有一種難以言傳嘅迷戀，噚日出席一個公開活動時，罕有咁鬧爆唔支持申亞嘅民建聯，指民建聯如果唔支持申亞，就同其他反對申亞嘅政黨一樣，係「冇遠見」、「唔愛香港」、「唔想香港繼續發展」。連扣三頂帽子落民建聯頭上都仲未夠，最後曾憲梓嚴詞質問：「民建聯點有理由唔支持申亞？」申亞一場大龍鳳嘅煞科戲咁精采，呢啲配角應記一功。
mailto:[email protected]