新股一街都係，公關最頭痕嘅，應該係幫個客諗計draw投資者同傳媒嘅注意，而近期最有創意者，莫過於做嬰兒用品銷售嘅合生元（1112）！公司呢兩日見完投資者再見記者，兩日都送咗「一大袋」紀念品（圖）畀大家，裏面包括4隻叫做「丁丁」嘅BB公仔同一個大背囊，最勁嘅地方係，個袋有近一米咁長，而且仲雞乸咁大隻字印住合生元個名！
華華前日親眼目擊各位芬佬面有難色咁喺啲公關手上接過個大袋，其中一個芬佬老友仲話，合生元呢招簡直當佢哋係人肉流動廣告板，要佢哋揸住個紙袋喺中環行走。華華噚日都獲贈「一大袋」，我都幫佢哋賣埋免費廣告囉！