【萬千星輝頒獎典禮2010之綠葉風波】無綫台慶頒獎禮進入倒數階段，除了視帝視后獎受關注外，最佳女配角獎一樣爭崩頭。胡定欣憑《刑警》差婆硬打《義海豪情》病妹陳法拉和《鐵馬尋橋》正氣妻惠英紅，但昨日胡定欣卻在facebook狂呻冇公平，陳法拉則自爆或有開心事發生，會買鑽飾自我獎勵，似乎曲線暗爆賽果。
無綫《萬千星輝頒獎典禮2010》中的最佳女配角，屬《刑警》的胡定欣、《義海豪情》的陳法拉和《鐵馬尋橋》惠英紅之爭。昨日胡定欣在facebook留言吐苦水，狂呻不公：「公平？我知冇可能真係做到公平，但只係公平少少呀，少少啫！其實如果真係有心幫手嘅，大家一定會感覺到！家係……得就得，唔得就算！咩意思都冇，真係『自生自滅』！不過我哋真係會『自動』地堅持住，撐住！」fans表態支持，也意會她所指的是台慶頒獎禮。
「呢啲係我心聲」
記者致電胡定欣時，她卻閂閘說：「唔回應啦，係我自己啲嘢啫。」她避談反更惹人猜測，她繼續堅持說：「呢啲係我自己嘅心聲，我有自己空間，每人有言論自由，我係同朋友分享，但唔需要同大家交代。」
提到女配角一獎，胡定欣說：「我對自己有信心，我由衷支持小紅姐，佢《鐵馬》做得好，希望佢再下一城。」陳法拉又如何？她說：「都做得好好，我鍾意佢《公主嫁到》嘅表現，都好支持佢。」但法拉入圍的卻是《義海》。
法拉鑽飾獎自己
昨日陳法拉和林保怡在澳門出席鑽飾預展，她佩戴總值逾200萬鑽飾上陣，未知其Neway太子爺男友有否買鑽飾送贈她？她說：「自己搵錢自己買更開心，今年拍劇多咗收入多咗，年尾睇吓有冇開心事，買鑽石獎勵自己。」陳法拉的high和胡定欣的down相反，兩人似互相暗爆賽果。另外，有網友認為陳法拉在《義海》中死得慢，她笑說：「我都希望角色冇病，都會聽觀眾意見同公司反映。」
同場的林保怡以《讀心神探》角逐視帝，他稱要視乎檔期才決定是否出席頒獎禮，但他本月9日會到新加坡參加電視頒獎禮，並以《掌上明珠》打入最後六強，笑言已當得獎。
採訪、攝影：夏琴（香港）、馬建華（澳門）
萬千星輝頒獎典禮最佳女配角提名
《刑警》 演員：胡定欣
《義海豪情》 演員：陳法拉
《鐵馬尋橋》 演員：惠英紅
《掌上明珠》 演員：商天娥
《美麗高解像》 演員：陳敏之
《女王辦公室》 演員：何韻詩
《鐵馬尋橋》 演員：李詩韻
《鐵馬尋橋》 演員：唐詩詠
《飛女正傳》 演員：朱慧敏
《天天天晴》 演員：陳茵媺
《情越雙白線》 演員：苑瓊丹
《情越雙白線》 演員：姚子羚
《女人最痛》 演員：江美儀
《摘星之旅》 演員：梁靖琪
《公主嫁到》 演員：關菊英
資料來源：TVB
