年尾將至，又係各路十大選舉開標之時！《華爾街日報》剛啱選出今年香港十大「話題人物」（HeadlineMakers），各大家族上榜，華華一啲都唔意外，但有趣嘅地方係，四叔李兆基今年咁矚目，竟然都敗喺首富李嘉誠手下，屈居第二，連呢啲排名都要輸，首富的確係四叔嘅宿敵喎！
《華爾街日報》話：「李嘉誠作為香港首富，如果佢唔係排第一就會好古怪！」但係頭11個月埋單計數，首富至大單嘅話題之作，睇怕都只係同國家主席握手拍照，佢位二公子澤楷疑似幫佢添多兩名男孫，又冇好似四叔咁，抱孫抱到被懷疑犯法咁大鑊。至於話神父要向首富致歉呢單，係咪咁大單就真係好觀點與角度囉！Bytheway，澤楷「潛水」近一年都仲可以上榜，其號召力真係好似嗰隻太陽油咁──確不同！
天匯+代母 熱爆全城
咁四叔方面，天匯世紀大撻定、大公子家傑搵代母整個「串燒三兄弟」佢嘆，淨係呢兩單都杰到不能再杰，仲橫跨港聞、財經、娛樂版，所以佢輸畀首富，華華真係好戥佢唔抵o架！
至於其他富豪叔父輩，彤叔鄭裕彤就因為年初嗰陣睇錯樓市而上榜佔一席位，精神好過華華好多嘅六叔邵逸夫，就因為「串燒三兄弟」阿爸家傑想斟買佢檔邵氏而上榜，查實淨係佢一百零幾歲仲周圍去就已經夠話題啦！另外，賭王何鴻燊就因為抱恙7個月同買白松露而上榜……但會唔會係佢3個太太嗰3房人馬，更有話題性呢？
《華爾街日報》選香港十大話題人物
第1名 李嘉誠 原因：天主教教區副主教因魔鬼論言論向佢道歉
第2名 李兆基 原因：天匯撻定事件、大仔李家傑搵代母生三胞胎
第3名 紀勤 原因：滙控高層大變動
第4名 夏佳理 原因：吸引多間大型企業嚟港上市
第5名 何鴻燊 原因：抱恙7個月、買白松露
第6名 李小加 原因：推動人民幣相關業務、延長交易時間
第7名 邵逸夫 原因：同李家傑斟賣邵氏股權
第8名 鄭裕彤 原因：年初話樓價會跌
第9名 歐智華 原因：滙控高層大變動
第10名 李澤楷 原因：同女朋友梁洛施生完大仔再生雙胞胎
李華華
mailto:[email protected]