自由黨高層大地震後元氣大傷，前主席田少出山整頓黨務，家陣自由黨形勢跌至谷底，田少好似喺股市撈底咁，贏面甚大，八方聽聞佢同周梁淑怡真係落手落腳介入黨務，聽日會分批會見有意出選明年區議會選舉嘅黨員。
知情人士強調明天會面安排並非揀蟀，呢點八方覺得信得過，事關暫時想出選者人數有限，諸多揀擇嘅話，咪買少見少？因此明天兩位元老，應該係向有意參選嘅人面授機宜，田少同周太都經過直選洗禮，如何取勝故然值得分享，怎樣面對落選都大把嘢可以講。
唔再讓田二少
退黨嘅田二少直選意志堅決，近日傳出佢對葉劉組黨有興趣，兩人是否結合未明朗，自由黨主席劉健儀噚日話，如果田二少加入其他政黨並出選，自由黨就未必會讓路或助選，皆因當初君子協定係基於田二少獨立參選，「離婚後再婚，都冇得繼續攞贍養費啦」。