申亞諮詢結束，香港人最實際，使幾百億元搞個亞運會，民意點都唔會支持，不過做官嘅都想名留青史，條數就唔係咁計，因此煲呔班子呢幾日忽然擺出起錨姿態，似乎已經返魂乏術嘅申亞工作，會否敗部復活，八方拭目以待。
葉國謙：做吓戲啫
幾乎帶頭唔支持申亞嘅民建聯，星期日會在將軍澳運動場舉行運動會，據講唔係為申亞造勢，只係黨員、街坊聯誼性質，黨團召集人葉國謙透露，已邀請特首煲呔同民政局德成局長做主禮嘉賓，亦會請精英運動員例如黃金寶等健兒到場，以示民建聯雖然唔支持申亞，但都好重視體育發展。
民建聯八年前舉行過一次同類型運動會，今時唔同往日，葉國謙爆料，當日仲有多個高官、副局同政助捧場，更會有個官、民競技環節，平日大家在議會內只係動口，當日就要動手，會舉行一個拔河，即係扯大纜比賽。
官、民角力勝負難料，牌面睇民建聯有幾個黨員做官，話唔定會放軟手腳，但如果呢次角力關乎是否支持申亞，形勢就好唔同，官府隨時逆轉勝，葉國謙噚日強調該黨對申亞立場，經中委會認真討論才拍板，佢揚言現時完全睇唔到有翻案機會，因此唔係話轉軚就轉軚咁兒戲，而扯大纜純粹遊樂性質，「我哋都係做吓戲啫！」
葉國謙又暗寸德成局長失策，話如果政府待到香港健兒在廣州亞運攞到多面獎牌，凱旋而歸才諮詢申亞，「相信效果會好好多」，家陣先至起錨，錯失良機了。運動與政治從來分唔開，難怪葉國謙形容拔河比賽係做吓戲，八方思疑，民建聯不支持申亞隨時都係戲一場，需知道保皇黨同官府好多時表面上「扯到行」各不相讓，實際上卻係扯貓尾，政治有時就係咁詭異，批評政府最激烈、鬧得最大聲嘅人，可能係政府最忠實支持者。
黨員唔妥德成局長
話得說回來，八方知道唔少民建聯中人的確唔like德成局長將個波卸畀佢哋，尤其係德成局長講到唔支持申亞，就等於唔推動體育，如此扣帽子，難令人服氣。
mailto:[email protected]