財政部噚日喺香港舉行人民幣國債發行儀式，唔少作為主禮嘉賓嘅中港高官同埋賓卡都有到場，雖然星光熠熠，不過來賓人數就唔多夠撐，一張張空凳顯得場面有啲冷清，中銀大廈70樓呢個場相對起酒店ballroom已經細好多，咁都坐唔滿，冇嚟撐場嘅賓卡可能要俾財政部打手板！
華華仲睇到，有在場嘅公關不斷叫遲嚟嘅人入座，仲叫埋啲後生嘅女同事坐埋落去，充當賓卡撐場！雖然係咁，個場仲係得一邊滿、一邊冷冷清清。計華華話，查實你邀請埋在場嘅傳媒朋友坐埋喺度，場面咪墟冚啲囉！班企到腳仔軟、仲要俾保安貼身「保護」嘅傳媒，一嚟有得坐，你個場又高朋滿座，一家便宜兩家着囉！