由麥浚龍（Juno）、蒼井空主演、黃精甫執導嘅《復仇者之死》前晚喺太古城舉行首映禮，不過女主角蒼井空因為腸抽筋就未有出現，但係佢都有錄低片段嚟支持，而陳子聰到場時被司儀梁奕倫三番四次叫佢做老闆，佢就即扮嬲話：「唔好再叫我老闆，信唔信我打你？哈哈。」
草蜢、關楚耀等都有嚟捧場，表現風騷嘅蔡一傑一到場就即撲向接受緊訪問嘅Juno身邊，仲即時錫咗佢面珠一啖，不過因為現場好多記者都影唔到相，蔡一傑又順應大家要求再錫多Juno一次，點知之後大家影合照時，蔡一傑喺冇人慫恿之下三度咀Juno，似乎傑仔對Juno特別癡纏。
蒼井空甩底
有傳蒼井空埋怨上次嚟香港宣傳太多，加上唔滿意老闆何超儀，所以佢今次就扭計缺席首映禮，另又有指蒼井空喺Twitter留言寫好憎香港，Juno就力撐對方唔係咁嘅人，佢話：「佢係演員，佢會配合宣傳，我同佢有通電話，佢病咗，佢一直都好開心，佢仲話多謝超儀畀機會佢轉型，令佢好感恩，可能佢之前一日內要做13、14個鐘好辛苦，佢有呻過，但都有話想再嚟香港。」