啱啱換屆嘅支聯會，噚日將超過6,000張明信片分幾箱寄去遼寧錦州監獄，為正在服刑嘅諾貝爾和平獎得主劉曉波打氣。支聯會副主席蔡耀昌話，呢批明信片係市民親自寫，唔少人仲寫上祝福同慰問語。明信片中有一張係由支聯會主席司徒華寫嘅，抱恙住院嘅華叔好有心咁寫咗：「曉波、劉霞伉儷：永遠與你們並肩前進。」
咁劉曉波會唔會收到？蔡耀昌話，有曾經喺內地服刑嘅異見人士話唔一定全部收唔到，點都會收到少少。
北京對劉曉波攞諾貝爾獎睇嚟仲係好唔高興。外電噚日引述挪威政府官員話，中方決定延期磋商兩國雙邊自由貿易安排，但冇定出新日子。當地學者分析，北京冇講明，但好明顯係中方喺呢個月10號諾貝爾獎頒獎舉行之前，都唔會有高層接觸。