有「科網女王」之稱嘅米克（MaryMeeker）近排決定御駕親征，走出大摩科技研究部，加盟創投基金KleinerPerkinsCaufield&Byers（KPCB）做合夥人，負責搵有潛力嘅新科技公司投資，相信會令當地科技界再起風雲！
華華記得，喺90年代，米克因準確預測互聯網行業嘅增長而叱咤一時，曾經被著名財經雜誌《巴隆氏》捧為科網女王，當年建議買入嘅股票如微軟、Amazon、Google同eBay，隻隻嘅股價都升到成支穿雲箭咁！而佢喺95年刊登嘅《TheInternetReport》就更加被譽為係科網熱潮嘅投資聖經。但其後科網泡沫爆破，米克等科網股大好友頓成箭靶，被迫玩低調。
潛伏多年，米克終於決定加盟KPCB大展拳腳，而KPCB嘅來頭亦都唔小，現有嘅客戶有新星Facebook同Twitter，米克早前揚言話大家正處於另一次科技創新熱潮嘅開端，華華喺度先預祝佢可以重振聲威啦！