朋友話羨慕我做車版，經常影林寶拉利呢類靚車，事實上好天曬落雨淋，真係有苦自己知！車Game王者《GT5》剛推出，入面個攝影玩法大躍進，靚車同背景進化到真嘅一樣，紅橙黃綠德美意法等億萬名車，任你排陣，使乜學我咁身水身汗呀？
記者：徐影龍
攝影：伍慶泉
Model：Betrys@GMEModels
鳴謝：PSPlayGround@LCX
高手教路：
調光暗唔靠快門
一開機已有4種唔同風格背景畀你揀，由京都櫻花夜景，到紅牛Hangar廣場都有，最重要係天馬行空嘅角度由你控制，毋須擔梯瞓低咁辛苦，自由自在高影或低炒。
我最欣賞的，係拍出嚟嘅作品可以輸出至USB手指，解像度有成3,840×2,160，達到800萬像素，莫講話抄入電腦做Wallpaper，就算冲印12R大海報都無問題。拍攝新手毋須擔心，今日搵嚟將玩具影到變真車發燒友Circle，親自傳授幾招簡易拍攝心得。
較大光圈影得靚
估唔到遊戲機玩影相都咁專業，效果同顏色重現好逼真，車身倒影出嚟嘅金屬質感好齊全。
想影得靚有幾點可以注意，首先快門只對背景物件有影響，如慢快門捕捉身邊擦過嘅火車；高快門可Capture到賽事激烈一刻等，想校光暗就要靠EV+/-喇！最易影得靚，就係校大光圈，令景深變淺，車身自然好突出。但要小心唔好過火，否則出現「爛景」情況。
任拍任攝勁過癮
拍攝模式早在五年前隻《GT4》已經出現過，由於贏番嚟嘅車可以盡情任影，車迷玩到大呼過癮！今次嚟到更高性能嘅PS3，高清靚相更令人期待。家陣上網Search，已搵到大量玩家的拍攝作品，你嘅反應九成同我一樣：「係咪真車嚟o架？」車身3D模型細緻到嚇親人，連車殼上面的景物倒映，一樣Details到爆。令立立電鍍鬼面罩、精細到分得出HID定LED嘅頭燈、有晒皮紋嘅內櫳佈局等，總舵手山內一典話，每位製作隊員需時6個月先「砌」起一架車！
假得咁真，全靠拍攝功能大提升，光圈由F1.0去到F45、快門亦由1秒去到1/8,000，仲有EV曝光補償，景深輕重全由玩家控制，難怪相片像真自然，完全唔似加咗味精嘅CG畫面。
秘技：影女都有獎盃！
今次收集獎盃唔只贏人咁簡單，拍攝系列獎盃都唔少。如伯恩市場街嘅金髮鬼妹，以佢為中心對焦拍攝，就攞到「肖像攝影」獎盃。仲有京都祇園內拍攝橋頭阿伯，以及東京R246賽道中、捕捉Honda車駛過本田總部嘅一剎等，睇嚟GT之父都真係幾鬼馬喎！
《GranTurismo5》
類型：賽車
機種：PS3
售價：$458