元朗南生圍濕地幾十棵大樹早兩日俾人放火燒毀，令好多人痛心疾首。距離下月18號南生圍項目發展期限屆滿越嚟越短，有網民喺社交網站facebook發起，下月12號（星期日）去南生圍舉行大型集會，盡最後努力希望保住呢片雀鳥天堂。
周四辦南生圍展覽
發起人之一民主黨元朗區議員鄺俊宇話，集會內容會打溫情牌，畀大家分享喺南生圍嘅點滴往事，仲會預備心形卡，畀大家寫低保留南生圍嘅心願，希望到時能夠號召到1,000人出席，然後全體人高舉心形卡影大合照，仿效當日千人怒撐菜園村。
鄺俊宇話已經寫咗信畀無綫同亞視，希望兩間免費電視台支持今次集會，至於以乜嘢形式支持就可以再傾。呢個禮拜四佢哋先喺旺角行人專用區舉行南生圍展覽。