大市在期指結算日終於有像樣反彈，12月期指上升373點，但成交進一步收縮，只有約650億，可見投資者仍處於觀望階段，未有見大市反彈便心急追貨。上日本欄提及大市成交開始減少，沽方並不算積極，應有助大市逐漸築底回升，可開始考慮分注吸納，自己亦跟昨日本欄標題「期指破低位正好增持」一樣，趁低加注，博大市見底，現階段士佳投資投機兩者兼做，若然穿底，就只做投資，不做投機。
投資者經常覺得買股票要講運氣，甚麼投資投機根本無分別，不過士佳就唔認同，因為兩者操作上實在差得遠，投資就係揀價格因為短期的市場因素，而暫時低於其應有價值的股票，通常這類股票都會將止蝕放得遠遠，甚至不設止蝕。
至於投機則屬於短線炒賣，一定會設止蝕，當一跌穿止蝕位，便會立刻清貨。筆者感覺上不論是上星期五或昨日買都唔係太擔心，因為投機係只要有值博率就會做，當時諗嘅反而係若大市上到23600時，圖表上會否營造右肩及應唔應該平倉，不過由22800上到23600都有800點，以當時波幅實在值博，如果快到達目標，就會考慮套利，否則繼續持有。
買國策受惠股要識揀
股票方面，筆者早前一直講點都要睇國策，例如機械製造板塊，改善民生股（如城市化、提高安全標準相關股）等近日都有不俗表現，讀者可繼續跟進。
不過要注意買國策受惠股都要識得過濾，我們經常睇到國家會繼續振內需，但內需範圍廣泛，做唔夠功課真係隨時中招，例如電力股其實都屬於內需類別，不時都會有醞釀提高電價的消息，但國家現時通脹一直上升，加電價看來又再落空，若然買中這類股票，真係喊得一句句，所以讀者買國策受惠股時，都要先睇清楚會否受大環境影響。
張士佳
寶來證券（香港）董事 投資服務部
mailto:[email protected]