理工大學噚日頒發「香港最受推崇知識型機構大獎」，據講呢個係國際性獎項，得獎機構有機會代表香港，角逐亞洲同全球最受推崇知識型機構大獎。講到咁威水，但八方收到得獎名單即時嚇咗一跳，最驚嚇得獎機構首推早前剋扣員工飯鐘錢、最後不敵民憤而跪低嘅大家樂。
中電港鐵都得獎
唔知大家樂係唔好意思拎獎，定係公佈業績踢晒腳，噚日頒獎禮全程潛水，認真唔畀面。
計埋大家樂，七間得獎機構有四間曾經俾港人鬧爆，包括幾個月內連續兩次被踢爆隱瞞大亞灣核電廠洩漏輻射嘅中華電力、身為母公司明知八達通出賣私隱知情不報嘅香港鐵路、舊年逼員工自動辭職嘅安永會計師事務所。
理大知識管理研究中心總監李榮彬話，得獎機構都喺知識管理上表現卓越，令公司不斷進步，而大家樂剋扣飯鐘錢同今次得獎係兩回事，唔擔心有人質疑結果。
至於其他得獎機構，仲有特區政府熱線1823電話中心、奧雅納工程顧問同天威控股。