《義海豪情》前晚圓滿落幕，教人感動的不只是結局情節，還有監製李添勝在台上向一班觀眾完全記不起名字的小角色致敬；包括劇中一場戲共有9句對白的楊證樺，為演好日本軍官角色，他不惜花3日時間學習日文，其專業及敬業精神和態度令人折服，就如周星馳在《喜劇之王》中所講：「臨時演員都係演員。」
無綫前晚為《巾幗梟雄之義海豪情》和《天天天晴》兩劇大結局，在電視城舉行《天晴豪情熱滿城》派對，兩劇主要演員均有列席。節目尾聲時，《義》劇監製李添勝上台致辭，除大讚各主要演員演技出色，更特別向一班默默付出努力的小角色致敬。
搵朋友學足3日
談到《義海》的小角色，添哥說：「每位演員都演得非常出色，但演得出色又何止佢哋？戲中好多小角色、臨時演員，佢哋都全情投入，呢方面令人眼前一亮。有場戲，楊證樺飾演宮崎隊長，帶班日本兵上劉醒屋企搞人口普查，呢場戲我睇完之後個心寒晒，因為佢演得太好，啲日文流利到不得了。」
添哥指不懂日文的楊證樺為演好他在戲中僅有的一場戲，不惜向朋友求教學足3日日文：「我打電話多謝佢，仲有好多二、三線演員好似戴耀明、李嘉同日伽等，仲有無數我遺漏咗，我趁呢個機會向TVB全體二、三線演員講多謝，我要向你哋致敬，有咁出色嘅演員同綠葉，TVB先有好作品！」說罷全體演員拍掌，場面感人。
曾奪美新秀冠軍
獲添哥點名嘉許的楊證樺現年35歲，美國出生香港長大，96年在美國紐約的全球華人新秀歌唱大賽中，取得當地冠軍（總冠軍為何韻詩），同年加入無綫做合約演員。對於獲添哥賞識，楊證樺昨受訪時坦言受寵若驚：「聽到有小小想標眼淚！我接每個角色都會盡心做。雖然得9句對白，但要對得住自己，求其做會俾人笑！」
問楊證樺會否想可以上到二線甚至一線角色？他說：「做演員梗係希望有出頭天，但我心態冇分一線二線，拍劇唔係一個人力量，缺一不可，有戲做咪得囉！」楊證樺更感謝添哥對他們一班不起眼的演員如此重視：「好欣賞添哥咁有吉士，講咗我哋嘅心底話！」
採訪：戴彩煥
