今年5月出動大量食環署人手、再夾埋警方一齊喺時代廣場上演強搶民主女神一幕，被狠批打壓市民表達平反六四嘅言論自由，直認有份做決定嘅署長卓永興，被調任勞工處處長，噚日第一日返工即刻有工會組織用請願嚟歡迎佢。卓永興可能習慣用打壓手段對付不同意見，遇到請願一樣截停。
卓永興噚日返新工，向傳媒話充滿信心做好呢份工，要促進勞工福利同保障工人權益。但呢頭講，幾個港九工團聯合總會成員請願，要求檢討現行勞工法例，包括落實集體談判權同保障加班費，但一去勞工處辦事處就被截停，搞到連遞請願信都要用突圍方法。睇嚟處長日後同勞工界關係唔慌會好。