申辦2023年亞運諮詢期明日結束，政府為硬銷，將籌辦經費由超過300億打兩折減到60億。噚日民政事務局德成局長更出絕招，安排一班本地體壇明星到立法會踩場造勢，不過，各左中右政黨，繼續冇人出聲支持申亞，張文光仲質問局長：「家係為咗體育而體育，定係亞運而亞運？」搞到德成局長死撐搞亞運係為下一代。
運動員驚政府閂水喉
港隊喺廣州亞運攞到破紀錄的8金15銀17銅共40面獎牌，唔少獎牌得主噚日現身立法會，運動員同埋運動總會代表有20幾人，包括單車選手黃金寶同黃蘊瑤、壁球手趙詠賢等，佢哋係由政府安排出席民政事務委員會特別會議，游說議員支持申亞。
個個運動員開口都話香港辦亞運冇問題，講出嚟都有佢哋嘅理由。如果申請之後搞唔成，運動員紛紛由力撐變成擔心政府閂水喉。黃金寶話，若果辦唔成，「原本預算喺亞運會投放嘅場館，係一定冇」，仲話明白要政府開口承擔，係相當困難，「通常政府都會保守啲，驚講得大咗」。
負傷作賽奪銀嘅單車手黃蘊瑤講明支持申亞，但就話政府起運動場地嘅承擔「好虛」，仲話，上屆亞運之後，政府應承起嘅室內單車場，到家連影都冇，「唔知（下屆）亞運前會唔會起到，對承諾有啲徬徨」。
議員好多都認同運動員嘅努力，向運動員解釋心中疑慮。張文光搵番高鐵做例，話籌辦經費由原先300億，大減至60億，但日後撥款可能係天文數字，仲話申亞係政府嘅面子工程：「係為咗體育而體育，定係亞運而亞運？」陳淑莊就話聽完阿寶講到冇亞運，運動員就乜都冇，反而好感觸：「點解要有亞運至有希望？」
借用爭雙普選嘅口號
議員唔支持申亞立場不變，德成局長亦冇晒符，回應時只話係下一代政府嘅事，「2023年（辦亞運），我肯定，我唔喺特區政府，要話風光，肯定唔係我嘅風光，我只希望大家畀香港未來一個機會」。「畀未來一個機會」咦，連爭雙普選嘅口號都用埋，睇嚟政府真係冇晒橋。
