李嘉欣懷孕4個月昨晚仍穿4吋高跟鞋往中環出席聖誕亮燈儀式，她透露與丈夫許晉亨本認為腹中BB漸告穩定，計劃往日本過聖誕，豈料母親大表反對，還出言教訓女婿一番。嘉欣又指懷胎以來工作未停過，酬勞2.5級跳，但有客戶投訴不習慣她上圍升cup。
李嘉欣、古天樂、陳可辛及吳君如昨晚齊現身中環，出席Swarovski水晶聖誕樹亮燈儀式，這棵閃閃發亮的聖誕樹上砌有2,000萬粒水晶。懷有4個月身孕仍然出席公開活動的李嘉欣，獲大會送贈一隻刻有It'saBoy的金色水晶兔仔，寓意她如願生兔B仔。
轉口味愛食杯麪
嘉欣昨晚穿上特別訂做的VeraWang水晶裙，腹部隆隆仍然穿着4吋高跟鞋，她透露重了十多磅，她說：「正常增長啦，胃口都冇特別大變化，係食多咗杯麪囉。」她又自爆與丈夫許晉亨都認為腹中BB算是穩定，本計劃往日本過聖誕，但母親反對，更以上海話教訓女婿說：「如果有事你點對得住外母？邊個畀番個外孫我？」所以兩人決定留港過聖誕看燈飾。
古仔君如做紙板
工作量大增的嘉欣又說：「已經推晒要往外地嘅job，但都仲係好多，媽咪又有微言話唔明我點解大住個肚都咁多嘢做。」問她酬勞是否三級跳？她說：「身形就三級跳，酬勞就2.5級跳啦，不過有客戶投訴話我升咗cup、睇唔慣，不過BB未出世老公已經叫我最好不停生，因為我陀BB以嚟，生活習慣健康咗、又準時瞓覺，好啱佢心意。」
此外，古仔及吳君如合作的新片《神奇俠侶》造型被印成紙板公仔，協助推動香港旅遊業，君如笑說：「咁咪唔使再對住成龍囉。」隨即補飛說：「不過唔係搶佢飯碗呀，冇錢收o架。」古仔則嘆今年已不知是第幾個單身聖誕，說笑叫君如介紹女仔給他。
採訪：JessicaNgan
攝影：ChenWaiOn