上禮拜五花旗股市下跌，噚日港股期指結算日低開，但最後轉升288點收市，呈破腳穿頭嘅單日轉向，恒指重越23000關，報收23166，技術走勢改善，不過，成交只有651億，10日線又下破50日線現死亡交叉，港股能唔能夠扭轉淡勢，仲要多睇一兩日。
噚晚花旗股市假後復市，感恩節假期零售數據只係一般，股市或者會借勢插落，道指11000關或受考驗。
利豐C輪24818：利豐（494）報收47.75元，升4.7%。股價11月初開始一直喺幾條平均線拉鋸，早前突然炒上，成交亦大增配合升勢，整固1日之後噚日又發力推高，有機會突破50元關向55元推進，可以諗吓隻C輪24818。
隻輪現價58仙，2011年7月11日到期，行使價48.88元，溢價14.5%，引伸波幅43.5%，槓桿率8.2倍（有效4.4倍），正股升上55元，24818睇1.03元，升幅有78%，正股跌穿45.20元就沽咗隻輪計數。
俊樺