【本報訊】面對直資名校的行政混亂和財務違規，唯一有權作監管的教育局卻自稱「冇牙力」，局長孫明揚出席立法會有關聆訊時直認監管不足，「同佢哋講有問題佢哋唔理，我哋好努力要求佢哋改善，但係我哋冇咁嘅牙力！」名校不簽署接受監管的合約長達八年，孫公則死撐是「歷史問題」和「法律問題」。有議員炮轟孫明揚卸責：「唔係冇牙力，係有牙唔出力！」
記者：夏志禮 倪清江
立法會政府帳目委員會昨召開有關直資學校管治問題的首日聆訊，孫明揚回應提問稱，教育局牙力不足，日後會反省並加強監管。他指，局方原來早已知悉審計報告發現的部份問題，無奈個別學校愛理不理，經過一段時間後仍未解決。例如以1,000萬元違規購入三單位的調景嶺真道書院，局方不斷要求校方糾正，但至今對方仍然沒有回應。
發現問題五年無行動
審計報告指22間學校學費減免計劃撥款不足，真道書院欠款更高達300萬元，該校自05年9月以來已遭教育局屢次提醒要「填數」，但至今年6月仍未採取行動。
議員鄭家富質問為何部份直資學校一直沒有簽署願意接受教育局監管的服務合約，有學校更一拖八年，孫明揚即大耍太極，「呢個係歷史遺留問題，唔係制度問題，因為當初有好多學校加入直資嘅時候，容許佢哋補辦手續，好多家係技術問題。至於部份百年老店，係牽涉好多法律問題，來往好多次又咬文嚼字都未解決到。」
報告提及五間未簽約的學校，兩間現已動筆。據了解，餘下三間頑抗的「百年老店」包括聖保祿學校、聖保羅書院及拔萃男書院，其中聖保祿多年來一直就合約條文枝節與局方周旋，由於三校法律上均有專屬學校條例，與局方談判至今仍佔上風。孫明揚強調，07年後加入的直資學校均已簽署合約。
對於部份學校獎助學金撥款不足，孫明揚指不覺得有大問題，「直資唔係間間都收得好貴，有啲收好少，有啲直頭免學費……咁有學校收少啲呢啲學生，收嘅非富即貴，咁就唔需要申請獎助學金。」
張文光：有牙冇用力
孫明揚指，今後會加強監管及懲處直資學校，但原來以往甚少向違規學校發警告信，至今只有真道及臻美黃乾亨學校「中招」，他強調，過去未有嚴厲執行發警告信，是希望以較輕鬆態度處理問題。
教育界議員張文光斥教育局「有牙冇用力」，「好多違規事項其實你提一下就可以糾正，局方牙就有好多，但係有冇認真看待過成件事？當年英基你都執得正，點會冇力？」第二次聆訊本周四展開。
孫明揚立法會上發言
「我哋好努力去要求直資學校改善，但係我哋都冇咁嘅牙力。」
「有地方做得不足我哋係承認，但係其實好多問題我哋之前已經發現到。」
「我哋有同個別直資（學校）傾合約問題，但係呢啲唔係制度問題，絕大部份係歷史遺留嘅問題。」
「我?一直話會喺今日聆訊公開所有嘢，唔存在隱瞞事實，社會人士要求學校解釋同認錯，係無助解決問題。」
「直資（學校）唔係間間都收咁貴，有學校一向都收好少甚至免學費，呢個我一向都知道。」
「問責係我本人問責，就算其他教育局同事知而我唔知，都係我要承擔責任。」