一年一度嘅「2010星尚大典」前晚喺上海舉行，頒獎禮頒發多個唔同獎項，當中包括經典之星、公益之星同先鋒之星，吸引唔少中港台明星撐場，李亞鵬、周冬雨、竇驍、徐若瑄、朱茵、劉曉慶、韓庚同韓星李多海等都有到場。一身黑色低胸裙嘅徐若瑄，出場時唔小心露出胸前防走光嘅膠紙，搞到佢尷尬整理衣服。
遭揶揄在家湊女
代妻王菲攞經典之星獎嘅李亞鵬都成為焦點，佢喺現場接受訪問時忽然宣佈息影，仲話未來都唔會再拍戲，搞到記者譁然，佢話：「我做了十年演員，現在演員已是過去式，今後都不會再拍戲，但會以新形式出現在大家面前。」但佢唔肯透露用乜嘢形式出現，同埋幾時出現。
不過，王菲啱啱先喺北京同上海復出開個唱，李亞鵬就趁此時喊收山，但佢冇正面否認，仲話：「你要這麼想也行。老婆想唱就唱，不唱就休息，也不是要專注嫣然基金，因為嫣然基金是一輩子的事情，而新的目標是我未來奮鬥的重點。」
對此李亞鵬噚日喺電話澄清只係換工作形式，冇話息影咁誇張，外間普遍揣測佢轉型做導演。但網友就揶揄佢因王菲復出搵錢，所以佢叠埋心水喺屋企湊女喎。
