財爺曾俊華今個月初去日本京都，出席亞太區經濟合作組織（APEC）財長會議，噚日喺佢個Blog貼文，讚到京都保育古蹟工作天上有地下無，由名勝清水寺到普通嘅民宿都保存到傳統風貌之餘，大部份古蹟唔會「活化」變咗現代化用途，而係「原汁原味」，將傳統變成「有生命的有機體」，唔靠人工，佢認為好多地方文物保育都做得唔及京都，暗寸香港包括近期開口埋口要「活化」嘅發展局做得渣。
舊水警總部剩番個殼
同今個月亦到訪日本嘅煲呔一樣，兩個人都大讚日本值得借鏡，齊齊做哈日族。財爺話無論公幹、私人旅遊，都成日去京都，每次都感覺良好，認為京都雖然保持住良好傳統風貌，但係一啲都唔保守。佢話個女讀大學時去過京都做交流生，嗰陣去探個女，已經覺得京都啲屋古老得嚟保養超好，到家都覺得當地景物就同幾百年、過千年前一樣，令人有時光倒流嘅錯覺。
除咗古蹟，財爺眼中連佢住過嘅民宿都一樣正到無倫，話屋主平易親切，待客如友，食物地道日本口味，大讚咁嘅風味就算大酒店都感受唔到。
財爺話京都保育可以做到咁嘅水平，主要係因為人哋全個社會都接受、欣賞同珍惜呢啲傳統人物風貌，令傳統可以成為生活一部份，「（成為）有生命的有機體，而不是靠人工的『生命維持系統』去「吊鹽水」續命」。
睇番本地保育項目，好似尖沙嘴舊水警總部同灣仔和昌大押，活化之後剩番個外殼，裏面嘅歷史風貌全部鏟走晒。財爺向來講嘢滋滋油油，全無火氣，今次例外暗寸保育政策唔掂，唔通有玄機？
唔想原地踏步要攞分
政圈有傳聞話，負責保育嘅發展局局長林鄭月娥有機會做下任政務司司長。曾俊華如果有得留低，又唔想原地踏步繼續做財爺嘅話，就要打贏林鄭。
八方心諗，佢可能因為新推嘅壓抑炒樓措施搞到地產界猛嗌唔掂，於是想食住度勢，挑戰林鄭嘅保育政策嚟攞表現。
mailto:[email protected]