隔籬泡菜國兩兄弟無厘頭開火，仲要話連續玩多4日，為咗唔重蹈上星期頭一日200幾炮炸冧港股嘅覆轍，大陸分析員即刻做嘢，幫股民嚴選呢個星期應該買邊六個行業嘅股票，頭一位就係同打仗有關的航空業。
分析員話，美韓黃海聯合軍演，特別係隻「華盛頓」號出動之後，中國自然唔能夠袖手旁觀，由東北亞嘅朝韓到西南印域嘅印度、以及同日本、越南存在嘅南海爭端，種種情況都顯示，中國有必要增加對國防領域嘅投入，如果受到某種催化劑嘅刺激，軍工企業定單好可能會有爆發性嘅增長，估計未來5至10年軍工行業會有好大規模增長……A股軍工板塊真係應該同金正恩講聲多謝。
至於另外幾個宜入貨嘅行業板塊，分別係鋼鐵（因為節能減排進入收成，鋼鐵需求仍強）、水泥（電力供求恢復，水泥價格仍向上）、煤炭（未來2個月焦煤最具漲價潛力）、電力（輸配電成本將監管，電力改革邁出小步）、同埋保險業（產業資本團保險股權長期價值認可）……唔知有冇人會講埋香港應該買咩板塊呢？