流動音樂廂房　搖滾狂奏

流動音樂廂房　搖滾狂奏

講求生活品味的男人，汽車與音響總是缺一不可，能將這兩種東西混為一體，享受層次即時以幾何級數提升。眼前這部新款BMW535i，不止裝上全身包圍升呢，更負上近十萬元的重裝音響，播着LadyGaGa的音樂，逼真度猶如她站在台上為你開私人流動演唱會一樣呢！

記者：趙慧敏
攝影：陳盛臣
Model：Annie@GMEModels
音響及車輛提供：Galaxy/TWAuto

現場演奏一樣

辣車配勁歌，猶如俊男配美女的組合般令人倍感受落，這部落地只有數月的BMW535i，作為GT房車，速度及外形當然唔會輸蝕，但偏偏腌尖的車主就連把聲亦要求多多，務求令其聲線越變越靚。為這部535i加把靚聲嘅係Galaxy嘅Ricky，單聽一首慢歌，已覺這套音響屬頂級貨，以我呢個外行人來講，Details位聽得清清楚楚，簡直好似有成隊樂隊喺面前演奏一樣！開住車門爆機，走到街頭都聽得見。

■加速爽快及攻彎穩定，是535i過人之處。

■保留原裝機頭，令外觀保持原裝模樣。

■車尾廂裝上四個Amplifier，令音色發揮至極限。

音響師傅Ricky

「要在不改動車廂的條件下而提升音效，頗具難度。」

不大改　要靚聲

要做到咁嘅效果，以Ricky做了多年汽車音響經驗來講，當然無難度。不過今次佢都俾車主考起，事關車主覺得新車落地，唔想將部車作太大改變，更加唔可以好似飛仔車咁，尾箱孭住個大喇叭，不過就要有齊快歌轟機兼慢歌聲靚的聽覺享受！Ricky最終決定在車尾廂設置四部Amplifier（擴音器），當然不是一般貨色，用上做CarAudio出晒名的意大利名牌Celestra！Celestra出名以精密的零負回輸電路設計，令Amplifier充份駕馭喇叭，對細微動作作出反應，令原音清晰演繹，難怪粒粒音都好似喺你耳邊響起一樣。
為了令全個車廂都被靚聲充斥，12個喇叭滿佈車廂角落，不過Ricky先將車廂內所有原裝喇叭換走，在車頭及門邊等不同位置換上高音及中音喇叭，令各種音色更加準繩，而重低音喇叭則藏在前座駕駛座及乘客位下，有別於一般人將喇叭置車尾的做法，務求令爆起機時，座椅都一起震盪，聽覺及觸覺一齊來，真係要幾High有幾High。

■重低音喇叭裝於座椅低，爆機時座椅亦感到震動。

■門邊上下兩個喇叭分為高音（上）及低音（下）。

■高音喇叭由於較原裝體積稍大，安裝時須擴大喇叭位置並配上皮飾。

外形更具殺氣

車廂音響都追求完美，對車身外形當然有咁上下要求，車主花上十多萬元，為將原來GT的外形更突出，除全車包圍及裙腳之外，更換上四輪20吋黑色合金輪圈，令全車變得更具殺氣。

■車主在外觀上亦花上不少心思，車頭包圍配上LED燈，動態十足。

■加裝兩邊裙腳，令GT形象更突出。

■四出式死氣喉，頗具殺氣。