剛在上周五受到炮火攻擊的南韓延坪島，昨日又再傳出炮聲，雖相信只是北韓進行炮擊演習，但足以嚇到投資者，期指曾跌穿上月低位22808，一度低見22766，外圍股市亦在歐債危機及南北韓戰局緊張下，齊齊下跌，調整似乎未停。
歐債危機其實已纏繞了市場近一年，市場早已明白歐豬要歐盟及IMF出手援助只是時間問題，筆者亦記得早幾個月前提過歐豬實際上係無得救，因為西方人享樂主義重，當你見到佢哋嘅人民明知政府周身債無錢還，仍不停罷工上街示威，浪費晒生產力，就知要佢哋勒緊褲頭過日子談何容易！驟眼睇歐豬問題確是一個危機，但當全世界人都知道無論點做，都幫唔得幾多時，這個問題便成為大戶舞高弄低的藉口。
淡友未算狠助築底回升
至於朝鮮半島局勢，士佳亦唔擔心最終會演變成戰爭，睇番過往幾年，兩韓其實時不時都有類似軍事紛爭，但當中牽涉太多政治利益，最終都可以安定下來。而且中國的官方傳媒已由最初偏袒北韓，改為首次使用「挑釁」字眼，來譴責北韓炮擊南韓延坪島，顯示中國對北韓令中國陷入外交困局的不滿。連大哥都出聲，相信事件應快可平息。
大市在多重壞消息下，上星期最終都要失守本欄之前所講的關鍵位22808，不過士佳講過此位失守並非代表轉勢，只是大市尚要調整得更深而已，今次調整反而為之前一直未買夠貨，又怕高追的投資者製造入貨良機。現時恒指已企於50日線之下4日，不過成交開始減少，沽方並不算積極，相信有助大市逐漸築底回升，即使悲觀一點，自己亦只係睇大市最多會跌至250日線附近，現時大約有1400點距離，話多又唔算多，反正過去半個月都跌了2200點，若讀者朋友看好中長線表現，士佳認為應是考慮分注吸納的好時機了。
張士佳
寶來證券（香港）董事 投資服務部
mailto:[email protected]