好耐冇「追」電視劇嘅敏妮，最近狂煲《義海豪情》，真痛快！套劇提到日本侵華戰爭後，物價高漲，一斤米要8000蚊，買條魚要過萬蚊。現實社會雖然未至電視劇所講嗰個年代咁誇張，但物價升幅都幾犀利。
物價高企 資產受追捧
敏妮好少入廚煮飯，所以真係唔知米貴，同媽咪輩同事講開先知，原來家陣一罐豆豉鯪魚差唔多成20蚊。前兩日同朋友喺茶餐廳食晏，碟頭飯30幾蚊碟，唔包嘢飲，份量仲少到唔算大食嘅朋友要叫多件三文治。
物價升，銀紙冇價值，所以個個搶購各式資產。咪以為「資產有價」，炒賣股票、物業就賺梗。
敏妮認識幾個基金界嘅朋友，都話唔識睇家陣嘅港股同港樓，因為價錢已經升到唔係好合理嘅地步，所以股、樓已經唔再係搶購對象。佢話家陣反而幫客人搵收藏品投資機會，古董、字畫，甚至當代藝術品都有。
玩到咁「專」，敏妮起初以為只係極少數投資者有呢個諗法，但近排見到唔少拍賣會，啲藝術品都係天價成交，似乎引證咗基金界朋友所講嘅現象。出得起錢嘅買家，唔少係大陸有錢人，可見大陸熱錢決堤情況。
藝術品天價成交有因
藝術收藏品呢啲另類投資，又點係敏妮此等一般散戶可以參與。不過，市場其實已經有專門投資藝術品嘅基金，雖然暫時好似仲未去到普及零售層面，但有求自然有供。
敏妮就覺得，就算係呢啲咁冷門、咁專業嘅投資產品，距離散戶仲有一段距離，唔係你杯茶，但認識多個市場都冇壞，就算唔真金白銀落注，同人吹吓水都唔會搭唔到嘴。
溫敏妮
http://wanmanli.com/blogs/