一年一度嘅白松露菌國際慈善拍賣會內最大嗰塊白松露，近年變成賭王何鴻燊嘅囊中物。拍賣會上個星期六晚喺澳門新葡京舉行，並現場直播到倫敦同羅馬。自己地頭拍賣點可以失威，據聞賭王下令一定要奪得菌王，但老人家身體唔太好而冇出席拍賣會，四太梁安琪，用咗33萬美金，即257萬港紙投咗兩塊菌王，畀賭王同好友慢慢嘆。
連續四年投到
唔知點解賭王對有「餐枱上的鑽石」之稱嘅白松露菌情有獨鍾，計埋今年呢塊菌王，已經係賭王由07年起連續四年投到，計計埋埋都捐咗過864萬出去，由主辦單位用嚟協助弱勢社群。講番今次個拍賣會，四太按賭王指示誓要投到一塊重0.9公斤菌王，喺自己地頭競投加埋有賭王無限量銀彈支持，佢好輕鬆咁就擊敗全球幾十個競投者，以257萬投得兩塊共重1.3公斤菌王。據聞賭王有菌王食兼做善事非常開心，幾日之後仲會大宴親朋，食餐菌王宴㖭。