大陸嘅飲酒文化，一向都令人聞風喪膽，唔好話做生意行走江湖，就連華華撈傳媒嘅，返親大陸公幹，經常性食飯嗰陣都俾人隊到「你驚我都驚，飲到面都青！」直到前日，華華終於發現一間好文明嘅國企──華潤水泥是也！
華潤水泥副總經理就傳授擋酒絕招，有一招叫「封山育林」，而效力係勁到係人聽到都唔敢隊你嘅！經理先生話，內地一孩政策，所有父母都會嘔心瀝血培育仔女成材，而喺骨肉未面世之前，準父母親為咗要有最優質嘅精子同卵子嚟製造小生命，好早就已經滴酒不沾；而因為牽涉到傳宗接代咁高層次，所以呢招一出，次次都將啲想隊人嘅豬朋狗友趕盡殺絕o架！
除咗平民，華潤水泥都好顧及班高層，佢哋個執行董事劉忠國（圖）話，今個月公司修改咗內部指引，舉凡集團內部敬酒活動，敬酒者要「乾杯」，但被敬者則可以「隨量」。點解有呢個新嘅行政指令？
佢話公司逢有喜慶，個個下屬都想同老總敬酒打吓關係，但咁樣其實對公司最高管理層構成好大壓力，而呢個新措施，應該可以令班高管襟捱啲！