《城市論壇》噚日討論樓市問題，好耐冇見嘅「禮義廉」橫額又重出江湖，獲四幅橫額恭候嘅係民建聯劉江華，佢已經超過半年冇喺《城市論壇》露面，對上一次出席係今年4月11日，當時俾班維園阿哥喪鬧，之後仲話要杯葛論壇。今次佢單拖出席，似乎諗定消極還戰。
劉江華發言為政府置安心計劃護航，但被柴台指佢為地產商「李氏力場」發聲。班維園阿哥又喺劉江華面前展示橫額，佢一於扮時運高睇唔到。
民建聯曾經因為俾人針對，發晦氣話唔再出席《城市論壇》，到上月初黨主席譚耀宗至亮相做嘉賓，現場有人噓過，到噚日出現橫額，唔知民記係咪可以一路頂落去。