對冲基金因為鍾意賺到盡，所以俾人睇成係食人唔骨嘅大鱷，但事實上，大鱷都有善良嘅。錢志健──對冲基金經理兼家族資產公司嘅董事，應該屬於當中嘅異類。
作為一個專業環球投資者，錢志健算係投資有道，08年金融海嘯後，上海股市狂跌44%，他管理嘅對冲基金仍然錄得正回報；鍾意揸大馬力哈利電單車籌款，以兩個轆嘅巨響，喚醒世人對有需要人士嘅關懷，難得嘅係，佢喺金融圈內打滾多年，對回饋社會，仍然非常有heart！
經歷咗金融海嘯，錢志健對金融圈嘅睇法改變咗。佢認為，對冲基金以至整個金融業嘅環境，都同以前唔同，令散戶投資變得困難。
就好似今年5月初，令道指15分鐘內暴瀉近700點嘅「肥手指事件」。（當時盛傳一名交易員因手指過肥按錯鍵，令到沽空額大增，之後美國投資者稱這次事件為flashcrash閃崩）就係一個好例子。
「家市場同玩家，同20幾年前轉變好大，家好多投資係透過人工智能落盤，普通人真係難以理解……」更重要嘅係，佢話：「喺香港投資好難，尤其是炒短線，因為印花稅實在太高喇！」
全職散戶炒家 藏3大危機
「認真的業餘投資者（seriousamateurs，即全職散戶炒家）其實好危險，因為第一，佢哋以為自己好清楚市場；第二，佢哋用嚟投資嘅錢永遠唔會太多；第三，會大量使用衍生工具及太集中於幾個倉位……」絕對同意，「叻嗰個死嗰個」嘅道理，同時適用於打麻雀同投資。
同時，錢志健亦好相信呢樣嘢─「喺投資場上，心雄（euphoria）比貪婪更差！」面對金融市場變化太大，散戶必須努力裝備自己，所以佢有三個建議：首先，就係要令自己投資領域嘅知識增加，做足風險管理，以及透過期權對冲投資。
資產分7份 防波動市
然後，就係必須學識分散投資以及「超級資產類別」（SuperAssetClass）嘅概念，而佢自己，就係師承聖經《傳道書》11章第二節：「將資產分開7至8份，因為你唔知將來會不會再遇上金融海嘯」，佢話呢個concept雖不至於百毒不侵，但起碼就都叫做有個金鐘罩保護一樣，應用喺波動嘅市況非常適合。
至於話有咩投資心法，錢志健嘅格言係，十分視乎個人的投資目的、風險程度同時間性。
呢位哈利迷舉咗一個例─超級資產類別，除咗一般股票或房地產，都應包括一些另類投資，哈利電單車就是其中之一。好似哈利1906年第一款投產嘅SilentGrayFellow，當時嘅零售價係210蚊美金，呢個價錢喺當時已經可以買好多間屋，而家呢款電單車嘅拍賣價，係35.2萬美元，即係話呢100年間升值1676倍……但亦都咁講，10個有9個都應該會揀買屋，再者，你要肯定自己有一百幾十歲命先睇到架車升值千幾倍囉。
第三，就照跟隨大市趨勢並減低交易次數，因為散戶的投資優勢在於中長線，減低交易才不至令投資者情緒失控。總之，16個字講晒「順勢而行，長短均可，風險控制，量力而為」。
錢志健給散戶的金句
「順勢而行，長短均可，風險控制，量力而為」
「喺投資場上，心雄（euphoria）比貪婪更差」
「呢個市況，買磚頭錯的機會較其他資產類別細好多」
善用人生下半場
操作期權係錢志健嘅專業，或者因為咁，佢對於時間值比一般人敏感「當你嘅人生有70歲，過咗40歲後，大概只剩番萬幾日，當中有7000幾日都係交易日，若果將時間全都放喺操盤，將會係一件十分愚蠢嘅事。」
「有好多人都想對市場造成影響，但其實好難，因為其他人嘅資金，永遠都比你雄厚，老實講，50年後，索羅斯都有可能俾人遺忘，所以要善用剩番嗰萬幾日。」
所以，錢志健亦從來唔吝嗇同新入行嘅操盤人或散戶，分享自己嘅投資知識同經驗，而且仲十分樂在其中。家，佢會定期去到一啲證券學會開辦講座，同投資者交流。
15%時間做慈善
除咗咁，錢志健亦會花15%時間喺非政府組織（NGO）嘅工作上，又同一班電單車友組成咗「盼望之旅」（Ride4Hope）電單車隊，每90日就會為一個有需要幫助NGO服務，實行寓興趣於慈善。
錢志健係少數認為80後要生存，係較上一代困難嘅60後。佢話從前香港人情味較濃厚，60後嘅人只要努力總有機會獲得成就，要成功的確比家嘅年輕人容易，家啲學生，他們競爭嘅起跑點，或多或少係由家庭背景所決定。
雖然香港社會變得兩極化，跨世代貧窮情況亦相當嚴重，但佢仍寄語港人要有盼望。「每一個操盤人，都希望自己能為社會作出貢獻，令呢個世界變得更美好，咁就已經好好。」
走訪全球搵平價樓
除咗股市，地產亦係重要嘅投資。錢志健話，近期佢一直將眼光放喺香港以外嘅地方，喺海外市場搵投資機會，最近就到過澳洲，好快就會去埋新加坡同美國，搵一啲價值低殘嘅物業投資。
「美國佛羅里達州德頓納海灘（Daytonabeach）嘅屋，07年嗰陣價格高達10萬蚊美金，但家只係賣2.5萬美金，即使美國唔太鼓勵外國人買當地物業，但喺扣取稅項後，依然係有利可圖。不過，呢筆錢喺香港，莫講話首期，真係連車位都買唔到……」係o架，莫講話車位，連勞力士Daytona都未必買到。
繼續講香港樓市，錢志健話，佢管理嘅家族資產基金，都會投資住宅房地產同商舖等「以家嘅市況，買磚頭同買其他資產類別比較，錯嘅機會真係細好多！」不過話說兩頭，佢亦深刻體會到本港樓市被內地人熱炒造成嘅泡沫：「當你有錢玩呢個遊戲嗰陣就係好，但無錢嗰時就係唔好。」
李華華
mailto:[email protected]