慶鈴汽車（1122）手頭現金高過總市值，防風力特強，趁調整，睇位翻一轉。慶鈴最新手頭現金55.4億銀人仔，冇負債，淨現金高達63.7億港銀，高過集團總市值62.5億港銀，超級現金牛，防風力強。又慶鈴最新NAV每股3.23元，現價PB0.78倍。場內汽車股經過呢期調整，PB都講緊兩倍至4倍水位，講折讓，慶鈴亦抵買。
再講，祖國總體汽車市場需求壯旺，單係今年頭9個月，汽車銷量已經逼近09年全年。大圍好景，慶鈴2010年度業績繼續醒神。係咁易計數，慶鈴全年度純利增長40%，到3.37億銀人仔，預期PE16倍。祖國作為全球最大汽車消費市場，加埋未來經濟增長動力，呢個PE唔係貴。呢轉吼實100日線2.30元兜轉，博慶鈴上番1倍PB，見3.23元，潛在回報率40%。
短炒世城睇升兩成
世紀城市（355）最新NAV每股1.75元，現價（0.57元）折讓67.4%。又世城最新NAV，仲未計入旗下富豪海灣（透過富豪持有）及香港仔南灣（透過百利保持有）資產重秤，或者獲利因素嘅增值反映。單係南灣，已變現而百利保應佔權益金額，已經高達42億銀，隨住項目入賬反映，世城一樣肥仔水。呢轉短打，博世城升20%到0.68元，折讓仲有大把向上收窄空間。
錢雋