在父母心目中，兒女永遠都長不大。黃日華近年淡出幕前，偶爾去內地拍廣告、夥張兆輝開「輝黃演唱會」，夠使夠食夠生活算。閒時弄盆栽、踢波，還有，湊女。為21歲的寶貝女芷晴做司機，華仔說：「咪係，幾好呀。」他笑得開懷，有女萬事足五粒字刻額頭。靖哥哥武功蓋世，StoneSir威武逼人，笑華仔咪又係做囡囡阿四，他甘之如飴：「我哋嗰個年代乜都冇，家梗係想仔女開心，呢個係社會性錯誤，唔關佢哋事。」
劇集上成女兒偶像
樣貌似足媽咪梁潔華的芷晴被封理大校花，華仔咪咪笑：「一般啦。」有仔媾吧？「正常吖，係驚佢冇啫。」芷晴拍拖未？「應該有。都20歲，冇就真係危險。」華仔會否要求女兒帶男友見家長？他笑說：「冇，識諗o架啦。」在旁三哥笑他：「我成日話你個女咁靚，唔好一個男朋友，搵多幾個男朋友揀吓。」
芷晴迷過棒棒堂，曾在紅館台上跟王子抱抱，現在是否依然情迷，華仔倒一臉茫然：「轉得好快，唔知呀。」三哥卻笑道：「佢個女最新偶像咪StoneSir囉。」華仔超冧，「第一集《刑警》播完，我第一個接嘅電話就係個女：『老竇，掂呀！勁呀！』好開心，哈哈！」
芷晴愛演舞台劇，如果女兒入行，華仔也無所謂，「讀埋呢幾年書自己揸主意，但我唔會全力幫佢行呢條路，我唔想佢孭住黃日華個女嘅名，對佢唔公平。」
三哥心痛女兒被影
52歲的三哥和戚美珍育有兩名子女，大女苗彤19歲，次子苗俊17歲，都在加拿大留學。苗彤三點式照被公開，問三哥有否心痛，他無奈：「梗有啦，但冇法。佢哋都好小心唔將啲相放喺facebook，奈何啲朋友將啲相放上網，咁先死。我又唔係唔知佢去沙灘，咪影嚟影去都係沙灘三點式，我覺得又如何，小朋友啲私生活傳媒無謂搞啦。」