許章榮，一手創立雅芳婷。97年一場金融風暴，吹倒了香港的日資百貨公司八佰伴。正值挨年近晚，雅芳婷一下子失去十多個銷售點，數百萬資金被壓死。許章榮決定在僅有的幾個自營舖割價傾銷，要錢唔要貨。經一事，長一智，他學懂凡事不可去得太盡，「賺少啲，總好過啃死！」
記者：陳皓怡 攝影：李潤芳
十多年前，雅芳婷的貨品主要放在八佰伴旗下分店出售。97年冬天，八佰伴突然結業，當時正值年尾旺季，雅芳婷倉庫堆積大量存貨，被拖欠大筆資金，周轉困難。許章榮徬徨之際，把心一橫割價傾銷，「因為平，嗰時喺中港城間舖，玻璃都俾人逼爛。」顧不了賺蝕，最重要是套現應急，「做生意，周轉到就得。好似人，有氣唔死就得。」
經歷八佰伴一役，許章榮深明要追求最高利潤，得承擔極大風險，「凡事唔好去得咁盡，預計造10萬張被，造8萬張算。做少一成生意，好過剩低兩成存貨。」
少做生意 勝剩存貨
客戶定單，他同樣寧願「食少多覺瞓」，樂於接中小品牌定單，拒絕大客，「細公司大家有商有量，大公司郁啲畀封律師信你。」許章榮說，近年內地通脹，原材料價格越升越有，不少行家為服侍大客，即使沒利潤仍要硬着頭皮接單，只能望天打卦原材料跌價，他慶幸自己可置身事外，「人做事但求樣樣暢順，好過擔驚受怕。」
對生意如是，對員工許章榮同樣不會去得太盡。「你要信夥計，佢已經做足100%，你仲要谷佢到110%？畀多啲壓力佢哋係會做多啲，不過做到慌失失，無乜癮。」
做生意唔去盡，並不代表許章榮願意落後於人，求新、求變，雅芳婷用的是「藍海策略」。83年推出多用被，一「被」風行，現在提到多用被，就會令人聯想雅芳婷。不過，許章榮並未為這發明註冊專利權，「有啲嘢限死得太多，反而會阻礙佢發展。當然有啲關鍵性嘅產品會註冊，有啲嘢係有意無意俾人用。」
再難行嘅路都要行落去
創業難，守業更難。雅芳婷創立至今已有27年歷史，正如許章榮說，「該買嘅已經買咗，唔買嘅亦唔會買。」為求突破，他選擇再創業──創立另一品牌「isimple」。新品牌食正環保大潮流，「環境製造潮流，潮流製造商機」。珠玉在前，今時今日建立新品牌，困難嗎？「難。但，難唔可以避，如果覺得行嘅路係啱，再難行嘅路都要行落去。」
許章榮簡歷
1936年 出生，祖籍廣東揭陽
1973年 創立章記床褥公司
1979年 將廠房遷往內地
1983年 創立雅芳婷品牌，同年推出多用被
2010年 推出新品牌isimple
10歲「創業」賣煨魷魚
創辦雅芳婷前，許章榮以山寨廠起家，名為「章記」，專造枕頭、海綿床褥等OEM（代工生產）床上用品，供應國貨公司銷售。「嗰陣無本錢o架，幾萬蚊，但嗰陣創業好易。嗰陣時李嘉誠都好少人工，佢造塑膠花，蒙民偉都係攞電飯煲，嗰陣好易發達，你哋家辛苦啲。」
人棄我取利潤高
不過，造床上用品並非許章榮第一盤生意，早於小孩時代，許章榮已是「生意人」。「最簡單就係去油麻地買幾斤欖，洗乾淨佢，賣一毫子幾粒。最暴利係去戲院賣煨魷魚。我o靚仔時做生意，好犀利，生意天份好高。」
正如許章榮所說，雖然年僅10歲，但他已有生意頭腦。「我去北河街嗰間陳元記買魷魚，人哋去買最厚嘅，我就專揀最薄嘅。一來快熟啲，二來一斤人哋12隻，我有16隻，賺多啲。」
那個年頭都有「走鬼」，但他卻冇有怕，「啲差人對靴好重，唔易追。何況，好肉酸o架嘛，堂堂大人追個細路仔。」如果真的給警察追到點算？「佢哋追我唔到，追得近咪掟個炭爐過去。」今時不同往日，各位切勿模仿。
發明家失敗作──鴛鴦被
許章榮有「枕頭大王」的美譽，為改善自己及朋友的睡眠質素，不斷推出功能性枕頭。作為「發明家」，當然要經常做實驗。他說，「以前同事通常都係白老鼠，自己鋪床都唔係床，好似實驗室咁。」
鋪床好似實驗室
除了員工、自己，他連行家朋友亦不會放過，工業總會主席孫啟烈是他的「御用測試員」。許章榮表示，晚上曾經衝上孫啟烈家，看看他可有試用產品，以及即時查詢意見。
發明家都有失敗時候，許章榮坦言「鴛鴦被」是失敗之作，「我哋花咗好多心機落去，但換唔到錢。」他仍堅信產品有其實用性，未能廣受歡迎，只因大家貪方便，「凍啲你會縮埋，熱啲就hea開張被，方便過你搵鴛鴦被。」
智鬥內地民工
70年代末，內地先開放深圳為經濟特區，由於香港當時工資高，工人難覓，許章榮遂北上設廠。回想當年做開荒牛，許章榮說當時內地資源很缺乏，要生產1萬個被袋，需要多帶5%原材料，「我哋啲拉鏈，大陸工人拎嚟縛雞縛豬，甚至拎嚟擔水，嗰時佢哋仲用緊井水。」
被袋拉鏈當繩索
除了資源缺乏，當年內地工人習慣「大鑊飯」，為免出現「做又三十六，唔做又三十六」的情況，許章榮想盡辦法，「逐件計時，佢就放飛機咁，10個被袋有5個係次貨。你話計日薪，佢就繡花咁樣。」當時香港工人每日生產100個被袋，內地工人僅生產15個。
許章榮要求內地工人效法香港工人的效率，反遭質疑，「佢哋唔信香港人做到100個，咁我咪搵香港師傅上去示範，做足120個畀佢哋睇，佢哋一粒聲都冇出。」
