無綫五虎出身的黃日華重返娘家，與三哥苗僑偉合演台慶劇《刑警》，他以低於9年前的縮水酬勞、面對制度下造成的資源及人手不足，他只是自我調節學會接受；豈料《刑警》出街後被冷待，在台慶冇聲又冇影，兩虎終極谷爆成為噴火雙雄。三哥直言心內一直抱不平，例如無綫早早就應該發掘原創，咪一味重拍金庸名著及歷史劇；華仔則謂無綫因沒對手而放鬆，論人工更奀到不足維生。愛之深，恨之切，兩虎發火有因，娘親，你明冇？ 撰文：朱倬誼
在發生鬧無綫「TotallyVeryBad」前，日前黃日華和苗僑偉曾在尖沙嘴接受本報專訪，hea慣的華仔已是連續第N日接受訪問，當時他還笑說：「我呢幾日做嘅嘢，等如幾年做嘅嘢。」他自動波宣傳，逕自駕車自備衣服還帶助手同行，樣樣做足，結果《刑警》卻在台慶冇聲冇影，又難怪他㷫。
返無綫嘆冷清
訪問當日華仔提到重返娘家拍《刑警》時，形容初時感覺很新奇，「再返嚟好有新鮮感，地方唔同人又唔同，要慢慢熟習環境，以前喺清水灣熱鬧好多，家分散晒部門，有啲幾冷清清啲感覺。」劇中他的動作場面不多，他直說：「可能budget問題，唔會好似以前咁大陣仗，有幾十個武師，呢個戲都係簡單動作，最犀利係有場爬竹棚戲同埋王浩信飛車。」
有噴火華之稱的華仔，開工時卻未有，他笑說：「冇得o架，因為公司制度搞到唔夠人手先遲開廠，人哋做緊嘢你仲鬧人快啲呀？冇得催，人哋都想好，了解咗環境就唔會o架啦。」三哥一旦聞到噴火華的火藥味，就會即時為他降火，「紓緩吓情緒咪整多兩杯奶茶畀佢囉。」
其實早幾年華仔都試過TVB，嬲娘親不求進，劇本搞不好，拍攝街景如一，結果被中、台製作趕過頭，華仔說：「當然啦，我無綫出嚟o架。因為TVB冇對手，放鬆咗，公司又上咗市。今次返嚟我都唔諗呢啲喇，我應承過三哥係幫手拍戲，其他嘢唔係我控制到亦唔需要我控制。」三哥則說：「咁多年嚟，呢啲嘢喺心裏面抱不平，奈何控制唔到，既然係咁不如安守本份。」
直指TVB人工奀
若然TVB份糧夠維生，安份守己被綁也甘心，問題是無綫向被指人工奀，華仔也說：「到家TVB嗰份都不夠維生o架。」昔日華仔和鄭少秋在無綫出名人工高，今次華仔卻說：「我邊度人工高？我拍《刑警》冇講過價錢，我做就做，當開心價囉。」他對上一次拍劇是9年前的《蕭十一郎》，難道今回拍劇反通脹？「當然會啦，我停咗咁多年，演員係海鮮價，話晒我都冇做9年啦，所以如果我為咗錢，一定唔會拍。」華仔和三哥不排除將來再合作，異口同聲古裝咪搞，華仔解釋：「唔係唔想拍，我驚體力應付唔到。」三哥更一語道破無綫難製作經典古裝劇：「TVB現有嘅環境、資源、劇本，拍唔到以前嘅經典嘢。古裝劇本要拍嘅都拍晒，金庸、三國、歷史劇重拍重拍又重拍，你話古裝題材窄得幾緊要，要創造自己嘅古仔，歷史劇同金庸經典劇唔好再拍啦。古裝喺內地拍最好，人力物力充足，景又靚，TVB開古裝一係街景（古裝街）一係荔枝園，都冇靚場景畀我哋enjoy。」
TVB壟斷電視業40年，明年政府發免費電視台牌照，對於新世紀電視大戰，華仔相信是好事，「新景象會有，但要轉變家嘅環境要好長時間，無綫都40幾年，根基咁犀利，要睇新嘅電視台目標同做法點。我覺得都係好事，有競爭先有進步。」
鬧亞視唔爭氣
三哥就另有看法：「簽合約你情我願，你想做TVB咪做囉，有啲滿約會離開或者去亞視，奈何亞視唔爭氣，轉咗咁多個老闆，個個都賴咗一大鑊走，出晒血嘅。TVB唔係專登壟斷，而係觀眾冇嘢選擇，呢個係歷史性遺留問題，同埋香港人慣性睇電視就會睇無綫。」
三哥續說：「無綫簽基本藝員，亦係養活一班藝員，起碼有基本收入，如果香港好似台灣內地咁冇簽基本藝員，TVB好多藝員冇嘢撈o架喇，當然唔好睇一線嗰班，睇三四線嗰班。其實好公平，唔想撈嘅你咪唔好簽TVB，但如果有能力出去搵食，走咗啦！願打亦願捱。事實上TVB出緊份人工畀藝員，點可能畀你上亞視、有線？呢個唔係壟斷，係合約精神。」