警方CCB探員上星期直闖北角廉署總部，拘捕三名涉嫌向污點證人「教導作供」妨礙司法公正嘅廉署調查員，被指風水輪流轉，係警方對廉署嘅大報復。保安局局長李少光噚日被問及此事，佢話警方絕無晒馬之意，實情係警方一早同廉署夾好，會低調進行拘捕行動，只係嗰日「唔好彩」，有幾個記者咁啱喺廉署門口，結果吸引更多記者到場採訪。警方見到咁多記者自然騰雞，咪call多幾十個手足維持秩序囉。李少光話自己做過廉署專員，知道廉署同警務署長有定期會面，保持溝通，仲拍心口保證警廉關係良好，雙方「合作遠遠大於分歧」喎。