近排睇《港股王》（ http://stock.nextmedia.com），發現多咗個新內容叫「人氣股榜」。起初睇唔知係乜，後尾問吓先知，原來係綜合咗當日各大傳媒股評人推介貼士，統計邊啲股份當日最多人推介，以表列形式刊登，唔怪得叫「人氣」股。
呢個「人氣股榜」可以令投資者知道，市場上邊啲股嗰期多人講，係焦點股。
有機會接火棒
慳妹問，「咁多人推介，隻股一定好勁，跟買咪好大機會賺？」敏妮聽完之後，只可以笑佢年少無知。記得敏妮初初學人買股票，都好似慳妹咁，睇勻當日股評人推介，邊隻多人講就跟買。飲茶食飯都係越多人排隊，代表嗰間食肆越掂。咁越多股評人推介嘅股份，應該越係堅料。當時敏妮入市買電盈（008），結果係點唔使講。
咁係咪當隻股票一多人講，就應該第一時間閃避？敏妮唔敢講，只係相信大家都有聽聞，市場背後有唔同嘅運作模式，推高質低除咗市場力量，亦唔可以抹煞人為動力，所以越多人講未必等於越堅料。
股王A就曾經提醒敏妮，有啲股份，啱啱俾人推介追捧，如無意外都應該有運行，不妨跟吓搭順風車。不過，當推介嘅人越嚟越多，咁就要小心，可能係派貨等你接火棒，速逃唔好貪心。
見人氣榜有隻股票東方電氣（1072），分別喺上周五、本周一、周四都上到榜，股價亦逐步向上，唔知後市表現點，會唔會引證到股王A所講，越推介越唔好買嘅rule，就要拭目以待。
溫敏妮
http://wanmanli.com/blogs/