千億新抱徐子淇、中國第一美人范冰冰、金像影帝梁朝偉等，昨晚在中環聚首，出席名牌卡地亞登陸香港40周年紀念晚宴。徐子淇大伯李家傑月前在美國搵代母生三胞胎兒子，她昨晚肚凸凸疑似大肚現身，開心表示老爺已經有男孫抱，自己追仔壓力冇晒，更會將母愛分給三個沒有媽咪的BB。
超級名牌卡地亞（Cartier）慶祝登陸香港40周年紀念，以及位於中環的亞洲旗艦店重開，一連兩晚舉行大型活動。「千億新抱」徐子淇昨日穿上新設計師VivianLuk晚裝出席酒會，性感谷胸更露出肚皮，徐子淇的紅裙設計巧妙，恰好遮住她的腰及肚，但在側邊看，發現她肚凸凸，疑似有喜，但她否認懷孕。
「我哋冇爭乜爭物」
子淇大伯、四叔長子李家傑今年7月在美國請代母生仔，一次過生了三胞胎：智信、智仁、智勇，四叔喜獲三個男孫，開心得大派利是。徐子淇06年嫁給恒基細少李家誠，三年抱兩，生了兩個女兒晞彤和晞兒，夫婦一直想為四叔追個男孫，面對李家傑後來居上，李家誠大讚BB可愛好玩，謂生仔一事順其自然，問他太太可會有壓力？徐子淇即時搶答：「我哋冇咁樣競爭，共通點係親情最緊要，從冇外間講嘅爭乜爭物，家人喺身邊最緊要！」
徐子淇開心大讚三個男嬰可愛，有份湊三胞胎的她說：「好得意，好乖，BB湊得好好，係好健康嘅小朋友，大女成日同佢哋玩，佢都乖咗好多，好似大家姐咁，拎啲舊玩具同佢哋玩。」她謂兩個囡囡和三胞胎住樓上樓下，所以不會呷醋。三胞胎沒有媽咪照顧，她承諾會分母愛給他們：「係，一定好錫佢哋，屋企人梗係錫屋企人，將來出街都會帶埋佢哋。」
「生多幾個保險啲」
徐子淇一直恨生仔，問她有沒有恨到口水流？她直認說：「本身都冇咁諗，見到佢哋就好想！仔係唔同，湊法又唔同，女可以sweet啲，男仔就要嚴格啲。」大伯一次過生三個仔，徐子淇生仔壓力可會更大？她笑住輕鬆說：「冇晒壓力！有咗呢三個BB，老爺嘅心願都圓咗，家可以鬆一口氣，生男生女好難控制。」李家傑搵代母人工授孕，揀嬰兒性別，徐子淇大可效法，她說：「大伯生三個係佢自己嘅緣份，佢做咗好多charity積返嚟嘅福份，好多人都冇咁嘅福份，自己唔會特登咁做，命運注定如果有就有，冇就冇。」老爺四叔有沒有偏心男孫？她說：「冇，老爺見到BB就錫。」徐子淇之前講過要生夠五個，家無生仔壓力，可會停工？她說：「一直想繼續生，屋企多小朋友熱鬧啲，仔女唔係一定乖，將來未必肯陪你，生多幾個保險啲，一路都繼續造人。」
范冰冰任代言人
被譽為中國第一美人的范冰冰，佩戴全場最貴重、超過4,000萬元的珠寶現身，開心宣佈成為卡地亞亞洲區新代言人。問她酬勞豈非很可觀？范冰冰風騷笑着說：「老闆在哪裏？」她謂品牌會送珠寶，她說：「他們承諾會送，我也會買，所以要更努力拍戲。」她之前接受內地傳媒訪問，讚揚做第三者的女人勇敢，惹來網民狂鬧，范冰冰否認接受過訪問，她說：「沒有說過，我也不高興！那篇報道是假的！」
梁朝偉透露仍忙趕拍《一代宗師》，繼續不斷受輕傷，他笑言電影已去到大直路，會拍到農曆新年。老婆劉嘉玲之前為他出頭，寸甄子丹，梁朝偉說：「玩吓啫，邊有咁樣！」兩人都忙拍戲，豈非無時間造人？他說：「呢啲要講緣份，唔抗拒有細路。」
採訪：梁錦雯、歐陽慧恩
攝影：陳俊強、黃偉雄、陳順楨