冬甩，美式食物，有無益我唔知，但味道好甜好濃，後生仔啱食；Donut，亦係香港o靚模組合，宅男一定覺得甜，有無益？我鬼知咩，後生仔鍾意甜食，班女仔又咁Sweet，斷估有益啩？今日Donut教大家做Gym喎，希望對大家「身」同「心」都有益啦。
記者：何兆彬
攝影：伍慶泉
o靚模通街都係，要出位唔容易，Donut即將推出月曆，繼續都係一招玩性感。
月曆同《Face》合作推出，相片由《Face》負責拍攝，仲Crossover埋Zing負責化妝，製作後交由模特兒公司自己發行，每本賣$88。打開一睇，由於臨近聖誕，今次相片充滿節日氣氛，又紅又綠，叫食正聖誕熱。打扮方面，嘩，師姐Rainbow真空上陣，着吊帶工人褲，露半球加事業線，令人眼前一亮，好激喎！「係，今次都幾激，起初攝影師要求我戴Nudebra影相，但效果唔好，最後我要求清場，連經理人Edmond都要出去，我真空上陣，貼乳貼，影出嚟效果幾好。」十八歲女，究竟底線如何？Rainbow：「三點不露囉，無意識不良就可以，家呢個程度都仲可以接受。」另一成員Sweet只有十七歲，剛剛中五畢業，月曆裏面嘅佢好大個女，唔笑都幾Cool，但一講嘢就知係細路女，真人眼仔睩睩，幾Cute，無嚇死人嘅嘭嘭聲巨乳身材，十分瘦削，只得93磅，無巨乳，惟有着Tube-Top，賣長腿。
約Donut影相示範做運動，全隊六人，今次約了兩位。唔講唔知，Rainbow原來係小學泳隊成員，咦？同方力申傳過緋聞，果然有共同興趣，佢話：「記得小學二年級，父母帶我去小童群益會學游水，三年級參加咗學校泳隊。」佢無贏過獎牌，不過喺海灘隨便游出浮台都無問題，叫做識游水咁囉，「想當年，每星期都要操幾次水o架。」上中學佢無再操水，鬼咩？泳隊飛魚個個都曬到黑黝黝，我係女仔都唔制啦，Rainbow今日皮膚白皙，唔講真係唔知佢係游泳健將。「中學後無做咁多運動，入行後工作時間唔穩定，就更加無定時做運動，家得閒，我會跑吓步咁囉。」跑幾多？「運動場跑一圈。」跑一圈400米咋喎，咁大運動量呀？師姐有做開運動，17歲卜卜脆嘅Sweet又點？唔講嘢酷酷哋嘅佢露出一個天真笑容：「我？無呀。」無運動？難怪一雙手臂幼得似藤條，瘦成咁！叫兩位靚女喺健身室做自選項目，兩人先選啞鈴，細細隻啞鈴當然無問題，大隻啲嘅就……嘩，仲重過你個人呀，咪亂嚟，責親隻腳就弊。
Rainbow做Gym
最怕小器男
玩多一陣，Rainbow又話：「跑步我掂。」跳上跑步機，熟練地㩒開始掣，輕輕鬆鬆跑十幾分鐘，無氣喘，然後又跳上划艇機，一下一下咁拉，呢次有姿勢有實際。呢部機佢好似玩過吓咁喎？Rainbow：「無喎，見佢幾好玩咁，咪試吓囉。」划艇唔易，需要全身運動，手要拉，腳要蹬，有睇剛上畫嘅《社交網絡》都知，划艇喺英美大學屬精英運動，玩划艇嘅男仔又靚仔又有型。話題一涉及擅做運動嘅男生，兩人爭住講：「我鍾意運動叻嘅男仔o架！」「我鍾意男仔識打乒乓波！」「籃球叻啲。」「篤波！」「賽車！」跟住乜乜，物物。嘩，運動型男仔係咪咁煞食呀？Sweet：「係o架。不過有啲男仔好難頂，臨出賽走埋嚟同我講：『呢個比賽係為你而跑！』咁兒戲，電視劇咩？」Rainbow：「試過有個男仔，贏咗跑步比賽就送咗個獎牌畀我。」出殺着，咁追唔追到手？「無喎，佢有啲怕醜，放低獎牌就走咯，後來都無甚麼行動。」咁個獎呢？「放喺屋企，唔通丟低同佢講話唔要咩？」除運動，男仔點先吸引到你？「有上進心囉。」咁行？咁有乜男仔不受歡迎？Sweet：「小器囉，有啲男仔玩吓佢就嬲；有啲男仔，連一個普通男仔Friend都唔俾我識，令我覺得無晒自由……」下場呢？飛起佢？Sweet甜甜笑，無答，算係默認。
掛住講男仔，唔記得做運動，見Sweet瘦弱，捉佢做幾下Situp，睇佢夠唔夠氣。佢好醒，望望健身室牆上面嘅姿勢簡介，就即刻知道點玩器材，雖然笑笑口唔多認真咁款，但一口氣都做到十幾下，問佢攰唔攰？佢笑答：「唔攰喎。」之後再做十下八下先停，青春，果然無敵。
Sweet做Gym
o靚模工作多發揮
兩個少女，一個十七一個十八，大把前途，好想同佢哋講一句：「世界是你們的，也是我們的，但終究是你們的。」兩人十五歲出道做Gamegirl做Model，近兩年多咗個Title叫o靚模，感覺如何？諗住一直做落去？原來二人仲讀緊書，Rainbow讀商科，Sweet讀緊夜校中六。Rainbow：「我其實幾鍾意呢類工作，工作變化多，接觸到嘅人又唔同，例如我剛剛客串嘅賀歲片《最強喜事》，套戲有古天樂、杜汶澤參演，見識廣闊咗。」有人對o靚模反感噃，點睇？「之前都有少女模特兒啦，阿Sa以前都係Model，不過我哋家嘅所謂o靚模，多咗變化，又唱歌又拍戲又做Model，多啲發展咁解啫。有個Model朋友同我講，拆開個『o靚』字，就係『口』加『青』加『見』，即係口才加青春加見識，我覺得呢個解釋都幾好。」話雖如此，但Rainbow哥哥就唔鍾意佢扮靚見人，「佢大我八年，佢認為扮靚化妝係發姣，浪費時間。我哋感情唔好，但父母無反對我入行，父母淨係同我講：『唔好行差踏錯，唔好睇錢咁重。』」
問Sweet對工作有何寄望，她眼神一片茫然，經理人代答：「佢想向MC發展。」之後佢補答：「有時工作見到DJ阿Bob、森美、小儀，覺得佢哋好叻，但我口才仍要訓練。」再問佢幾句，佢又話想做化妝師，「化妝師好偉大，好似天使咁，一個平凡女仔，俾化妝師執一執，港女都可以變成日本妹。我見過嘅化妝師都好有型，唔講仲以為係明星。」答咁耐都無話想做Model同明星，咁阿兩位Model又鍾意邊個呀？二人齊答：「佐佐木希！」
聖誕月曆$88
