"大阪飛腳土炮唔「水」"
日本波今屆早捧鯨魚，提早封王當然恭喜佢哋，但嚴格嚟講，逐場計捧佢哋，唔係咁盞鬼；周中唔知係咪早排慶祝玩到腳軟，主場強陣都輸得畀FC東京，真係幾。
J聯賽好聽啲講今季幾均勢，其實水準較近季係低咗，睇吓亞冠盃飛腳同紅鑽喺16強就畢業已可證明。鯨魚個人主義較濃，下屆想係亞冠盃逞強，要有進步演出。
講開飛腳，今季一早有主力外援離隊加上傷兵多，外界都唔太睇好，結果重用新秀下，反而喺國內有唔錯成績；今日早場能打贏水手，極大機會奪亞軍，係繼佢哋05年封王後，最佳聯賽成績。所以話，用新秀喺亂局，水準唔高嘅聯賽未必唔好，今日最早場1.5倍主W就係熱啲，但對手水手季尾散散地，試玩飛腳贏1:0，2:0波膽何妨？
"保頓唔「黑」越踢越勁"
季初大家認為西甲華倫財困主力四散，今季唔多掂，結果又唔係喎，歐聯剛又提早入16強；仲有一隊更平實，更冇名牌嘅球隊，表現仲驚喜，佢哋就係英超保頓。
保頓向來喺中下游掙扎，上月更傳出負債成億鎊，要喺一月轉會窗賣走主力，結果不利消息傳出，球隊乘列強頻自殺，標上第5；其中腳法麻麻嘅瑞典箭頭艾文達踢到曉飛，今晚英超迎戰黑池，對手為小弟尊重嘅愛隊，但係作客都唔守波，副選門將擔正上仗頂得住贏狼隊，今晚難望擋到上晒身嘅青龍、艾文達同戴維斯兄咯！膽粗啲，捧埋[-1]。
"「熱」唔穩再試利記冷W"
越嚟越多人欣賞嘅熱刺，周中大炒不來梅3粒圓3連勝，大家又見到佢哋4-4-2陣式兩翼齊飛嘅厲害。咪話人膚淺，進攻足球，幾時都多擁躉，班波真係幾好睇；不過佢哋聽晚迎戰利記，我認為斷纜機會高。冇咗謝四，利記上場大炒韋斯咸爽咗好多，講搶截能力，利記一定喺熱刺之上，要打穩守突擊，有回勇嘅費托夠殺，周中又冇波打，體力遠比連踢兩場硬仗嘅熱刺好，3.5倍客W又心動咯，希望繼3周前推介紅軍殺車仔後，再中一次。
"國米熱W唔敢再食"
諗起利記，自不然諗起前主帥賓尼迪斯，周中捱夜，真金白銀撐佢哋贏川迪，真係嚇到鼻哥窿都冇肉，國米班波點解會搞成咁？主場鬥荷甲兵川迪，半場被圍攻，我真係冇眼睇落去，好彩瞓醒仲見到1:0。完全走晒樣嘅名牌，明日歐洲波早場作今年最後1次主場出擊，大熱國米，遠離我！
"撐皇馬食塞唔會眼瞓"
下周一深夜4點開波嘅巴塞鬥皇馬，應該唔會半途瞓着啩，摩連奴教邊隊邊隊勁，尤其要佢防守，唔太理解正牌莊家可以開到巴塞得1.85倍W；後者放走耶耶托尼同伊巴套現係敗着，今場中場優勢估計唔會明顯，[+1]皇馬必捧，再小注冷W。
語錄：名牌球隊若有分頭，應多看兩眼，因為這類機會不是常有。
蘋果波神