香港設計大使喺中環域多利監獄，舉行創意展覽deTour2010，香港同埋日本20個設計師，以「notguilty」無罪為主題，聯手將陰森嘅監倉，打造出特別視覺效果，例如室內雨中漫步、照鏡左右調轉、公屋單位變蜂巢等。不過，最吸引都係影子裝置，設計師朱力行利用感應器將影子嘅影像記錄下來，3秒之後再投射返出嚟，新舊影子就會同一時間出現。朱力行仲示範點樣令到兩個影子打完交之後言和，再握手擁抱。佢同八方講，監獄係一個面壁思過嘅地方，囚犯會悔恨過去，利用新舊影子，就可以呈現過去同現在嘅對話，有反省作用。創意呢家嘢唔可以淨係用文字表達，最好自己去域多利監獄睇吓，展覽期至下個月12號。