研究法定最低工資附屬法例嘅小組委員會噚日首次開會，自由黨主席劉健儀話好多中小企同佢呻話唔了解條法例，建議勞福局局長張建宗設立專門熱線，解答僱主疑難。張建宗向佢大力推介勞工處熱線：27171771，話呢條熱線24小時有真人接聽。鍾意玩嘢嘅長毛聽到局長咁講即場測試，點知打咗好多次都係語音電話，㩒極都冇真人接，即時寸爆局長報錯料。
職工盟李卓人原本諗住喺會議尾聲提出動議，要求政府將最低工資實施日期提前至2月1日，以及提前檢討最低工資水平，當時工商界議員全部走晒，通過動議冇難度，點知臨投票一刻，民建聯葉國謙突然閃咗，搞到會議唔夠法定人數，投唔成票，阿人質疑葉國謙玩整蠱。