做人難，做平凡人原來更難，就如黎耀祥在《巾幗梟雄之義海豪情》中扮演的劉醒，雖不及排骨仔和非凡哥出位，也沒有柴九的跌宕人生，看似平平無奇，其實演起來最考功夫。一場跟九姑娘鄧萃雯的內心戲，祥仔因為想起已離世的母親，他回家路上更控制不住邊駕車邊落淚，祥仔說：「劉醒同九姑娘講：『一個人行到盡頭，最慘嘅唔係死，係同最親嘅人分離。』自己講嘅時候諗起媽媽離開，感受好深好深。」 撰文：戴彩煥
無綫劇《巾幗梟雄之義海豪情》明晚播映大結局，雖然黎耀祥是《義》劇男主角，但論風頭，明顯被排骨仔敖嘉年和非凡哥麥長青蓋過。不過，當全世界認定祥仔會因為風頭被搶而感到酸溜溜時，他卻坦然告訴大家他不會介意。
祥仔日前接受本報記者專訪時說：「我真唔係介意，能夠得到觀眾注意，我衷心戥佢哋開心。唔能夠一個主角做晒所有戲，如果成套戲以我做主導嘅話仲驚！我唔希望觀眾淨係睇我一個，連側邊角色都咁好睇，先至證明個劇成功。佢哋今次安排我做劉醒呢個角色，唔係要我去搶戲、唔使我再做八頁對白嘅戲，今次玩法好唔同，今次輪到雯女做大龍鳳，佢哋只係要我做一個經歷者，見證住大時代轉變。今次側邊已經有好多人大鑼大鼓做大龍鳳，如果我又大鑼大鼓嘅話，就會太多。」
憶亡母淚如泉湧
演戲演足20多年，祥仔表示甚麼大鑼大鼓角色也曾演過，對他而言，這類型角色已沒有太大難度。倒是今次演一個如劉醒般看來平平無奇的角色，才是他演藝生涯中最考功夫。祥仔說：「劉醒呢個角色係有難度，因為冇手段去做，唔似《巾幗梟雄》嘅柴九咁，又有金句又有呢樣嗰樣加加埋埋。以前做親嘅角色都有好多技巧要求喺度，我做咗咁多年戲，呢啲技巧可以好輕易處理到，但劉醒呢個角色係入心，要用個心去演，自己以前從未試過。張華標（編審）一開始已經同我講，今次個角色唔係玩以前啲嘢，係好實在、好內斂、好有深度。今次俾我發掘到用個心去演，我真係覺得好正！」
雖然劉醒不及柴九出位，但祥仔不諱言演戲多年，劉醒是他演繹眾多角色中最愛的一個，因今次不再單單講求演技，他說：「因為樣樣嘢都入心，所以有好多好深嘅感受，好似戲裏面個妹病、冇得救，我不期然諗番起已經離開咗嘅媽媽。媽媽對我人生影響好大，佢係一個好知足嘅人，佢在生時經常教我做人要自強不息、要有堅持，我咁多年嚟奮鬥嘅動力，就係咁不知不覺中培養出嚟。我有今日成績，都係多得媽媽。戲裏面劉醒同九姑娘講：『一個人行到盡頭，最慘嘅唔係死，係同最親嘅人分離。』自己講嘅時候諗起媽媽離開，感受好深好深，深到之後收工揸車返屋企，一諗起呢幾句說話，自己都忍唔住喊出嚟，一路揸車一路喊。我曾經問過編劇點解能夠寫得咁到肉，佢話：『我曾經試過。』」
升呢一哥密密賺
由《巾幗梟雄》到《義海豪情》這短短一年間，祥仔一哥地位已被肯定，不過他卻未感覺到有太大轉變，他說：「做咗第一男主角，咪戲份多啲，張海報排頭位囉！但對我嚟講，最重要係個角色好唔好玩，觀眾欣唔欣賞，形式嘅嘢對我嚟講真係唔係重要。不過我不得不承認，呢一年自己個市場價值係高咗，廣告會多咗，對社會功用大咗，好多大大小小唔同慈善團體都會搵你做乜乜之星，以前東華同保良係同成班人一齊演出，家自己會有獨立嘅表演，呢方面就最明顯。」
