港隊喺亞運贏得歷來最好成績，八方相信生前大力捐助體壇嘅全國政協副主席霍英東泉下有知，肯定老懷安慰。講開講，八方噚日就真係見到霍老笑笑口、仲好精神。唔使驚，八方唔係撞鬼，而係去咗皇仁舊生會中學，校方整咗個霍老銅像，邀請霍家二少霍震寰主持開幕。八方企正喺銅像對面，當霍二少拉開布幕一刻，霍老銅像雙目炯炯有神，臉容栩栩如生，八方幾乎以為佢顯靈回歸。
出自廣州雕塑家之手
連霍二少望真座銅像後都讚不絕口，話係佢見過最神似嘅一座。霍老係政商名人，讀過皇仁，仲係皇仁舊生會永遠榮譽會長；佢生前出錢出力捐助學界同體壇，離世後中港兩地好多團體為佢老人家鑄像。八方上網搵資料，發覺之前幾個銅像確實係給比下去。
好似上個月中大揭幕嘅銅像，用玫瑰花襯托形象硬朗嘅霍老，令人O晒嘴。又睇吓霍老生前捐錢最多嘅科大，校方08年落足本錢整咗個全身銅像，塑造霍老波牛look，家睇返似苦力多啲囉。霍老係知名親中商人，中總兩年前為佢鑄像，但銅像笑容好僵硬。
上述三個銅像揭幕，二少霍震寰都有出席，所以八方好肯定霍二少噚日係衷心讚嘆新銅像雕工。二少仲話家族整過幾座銅像，冇一座滿意，即場打聽座銅像係邊位名師嘅作品，話要邀請佢幫幫手。據皇仁舊生會中學校董陸偉雄透露，座銅像係出自廣州美術學院雕塑家段起來之手。段起來係著名雕塑大師，大嶼山天壇大佛就係佢嘅設計，皇仁書院嘅孫中山銅像都係出自佢雙手。
陸偉雄話校董會提供咗好多霍老照片畀段起來參考，而段自己亦都做咗大量資料搜集，所以座銅像形神俱似。今次鑄像費用只係十幾萬，由校董會出錢，算係對霍老當年捐建校舍嘅回饋。銅鑼灣皇仁係傳統名校，舊生後來搞咗間皇仁舊生會中學，兩間皇仁算有「血緣」關係。
霍家無意捐關愛基金
霍二少噚日心情唔錯，八方問佢霍英東基金會唔會捐錢畀政府嘅關愛基金，估唔到佢即時耍手擰頭。八方記得上次佢出席公開活動時，仲話會研究研究，點知今次佢實牙實齒話：「我哋基金會原則上係自己直接做慈善項目，好少會捐畀另外嘅基金。」八方問佢會唔會開會傾吓，霍二少話冇需要喎，表現堅決，睇嚟政府應該唔使打霍家主意喇。
mailto:[email protected]
