第3次參加亞運，港隊能夠取得過半世紀以來最好成績，加上賽事喺廣州舉行，感覺份外難忘；如果自己體能同精神上依然應付到，我好樂意繼續為香港踢亞運。
今次亞運喺廣州舉行，好多義工同工作人員都係廣東人，大家同聲同氣，喺選手村叫車都方便啲。選手村啲房冇電視同電腦，我唔覺得悶，因為港隊行程好緊密；我哋每日食完早餐會喺村內拉筋，返房休息一陣已經要食飯，之後就準備練波，跟住食晚飯，冇耐又開會，隊友有時間先會去隔離打機同上網。
初時我哋download咗啲軟件都上唔到facebook（面書），但見其他國家運動員又得喎，於是歐冲（歐陽耀冲）走去問伊朗球員；佢哋教我哋用佢哋語言登入，結果真係得，咁先可以同家人保持聯絡。
港隊今次能夠打入16強，單講成績肯定有交代，可惜輸俾實力唔算太強嘅阿曼；其實我哋對阿曼賽前真係好有信心，可以話信心爆棚，以為有機會。
簡單嚟講，港隊輸在前線球員質素唔及阿曼。無論點，港隊喺今次亞運已經做得唔錯，但諗到再過幾年，港隊喺個別位置面對青黃不接問題，就難免有啲擔心。記者：曾雁平
陳偉豪（港亞運足球隊隊長）
28歲，今屆以港隊隊長身份領軍戰亞運，結果在賽前被看淡下，港隊先在分組賽逼和阿聯酋，繼而爆冷歷史性贏烏茲別克及炒孟加拉，以2勝1和成績出線，可惜16強以0:3不敵阿曼出局。