吳君如、梁詠琪（GiGi）及何韻詩等，前晚到尖沙嘴出席時裝品牌MarcJacobs活動。近日趕拍賀歲片《我愛香港》的君如工作忙無暇湊女，幸好老公陳可辛暫做湊仔公，君如盛讚囡囡識賣口乖，最叻爸爸。
吳君如及梁詠琪等，前晚到尖沙嘴出席MarcJacobs活動，君如透露剛拍完賀歲片《我愛香港》便趕來活動，又指忙到無暇湊女，她說：「我05（早上5時）開工之後即刻嚟到，都唔明啲賀歲片要咁趕，好似嘉玲姐咁講。」
「爸媽都係No.1」
問君如要等哪一個藝人的檔期而要超時工作？她說：「等全台，我同梁家輝同曾志偉最多戲，年年啲賀歲片都鬥多人。好彩Peter（陳可辛）返咗嚟湊住個女，佢真係好識人，之前就話媽咪係No.1，喺Peter面前就話兩個都係No.1。」
去年吳君如為黃百鳴賀歲片女主角之一，記者指今年她倒戈相向打對台，她笑言：「唔好咁講，我都去過黃百鳴嗰邊探班，我拎嘢畀古天樂，黃百鳴都講笑話睇吓點，今年有8部賀歲片，好耐未試過咁熱鬧，搞到我做表情都要出力啲。」
嘉賓名單絞盡腦汁
另外，有傳陳偉霆已向蔡卓妍（阿Sa）跪地求婚，曾與阿Sa合作的君如說：「好耐冇聯絡佢啦，等佢哋自己公佈啦，家啲年輕人好大膽，乜都敢講。」君如又透露綜藝節目《星星同學會至尊版》仍未定好嘉賓人選，她笑言：「不如請成龍，一係阿Sa同鄭中基，呢啲咁爆，酬勞要收貴啲。」而GiGi已準備好平安夜北京演唱會的服飾，並指怕內地觀眾看不慣，故服裝不會太性感。
採訪：譚倩宜 攝影：陳志嵐