近年最猛烈嘅審計風暴席捲全港直資學校，教育局高官面臨立法會政府帳目委員會聆訊，有議員認為相關學校管理層有責任、有義務向公眾解畫，八方相信一眾校長、校監難逃被審命運。
亂估赤字達399億
一直熱心母校拔萃校務、籌款活動嘅議員張宇人，對於審計署抽秤直資學校不以為然，噚日質疑審計報告雞蛋裏挑骨頭。佢話財政預算顧名思義只係預算，邊可能百分百準確？批評學校低估盈餘、儲備係篤數正一事後孔明，若然預算同最終盤數分毫不差，係咪仲有篤數之嫌呢？
張宇人又指直資學校預算失準只係小兒科，同全港篤數之王比較，真係失禮兼慚愧。誰是張宇人口中嘅篤數之王呢？之唔係掌管政府收支嘅財爺囉！張宇人話財爺鬍鬚曾做每年一度預算案，條數也不見得很準確，08/09年度財爺估計有75億元赤字，實際僅49億元。
去年預算案，鬍鬚曾估計赤字高達399億元，結果盈餘達190億元，一來一回相差幾百億元，篤數如此離譜，一句對唔住都冇，審計署無權過問，難怪張宇人睇唔過眼。根本制訂預算案就係一門藝術性工作，如何巧奪天工地評估盈餘、赤字憑靈感，八方翻查紀錄，發現鬍鬚曾真係一個幻想力爆燈嘅藝術天才，前年預計庫房連年入不敷支，最快要到2013/14年度先至回復收支平衡，呢個咁有創意嘅預言，令人佩服。
篤大赤字奉旨加稅
今年賣地多次創出天價，庫房氾濫，鬍鬚曾卻預計本年度有38億元赤字，有個咁有創造力嘅財爺，大家話係咪港人之福呢！其實港府篤大赤字條數由來已久，回歸前曾蔭權做財爺時已有此伎倆，隨後兩任財爺包括阿松、唐英年都有樣學樣，篤數有乜好處呀？奉旨加稅、唔派糖有理囉，直資學校低估盈餘、儲備，申請加學費，用嘅都係同一條橋啫，家陣州官可以放火，百姓不能點燈，直資學校咁鬼㷫，都唔係冇道理。
mailto:[email protected]