停牌超過6個寒暑嘅大凌集團（211），又有小股東告港交所（388），仲要求賠償千四萬㖭！自稱「由毫子買到仙」嘅小股東胡錦波（圖）話，佢02年起入貨，買買埋埋有成四千萬股，足足用咗二百萬，等足6年幾都仲未等到復牌。
今年初，佢去搵港交所理論，對方話要保障未來股民嘅利益，又無明確答因咩理由唔准復牌，只係叫佢耐心等候，激到佢一肚氣。胡生覺得公司有盈利同分紅畀股東，證明運作正常，如果真係有問題，就應該搵廉署同商罪科去查，無理由停牌停咁耐，搞到小股東手上嘅股票貶值。佢話，「股票市場唔一定要贏，但係一定要公平買賣。」所以決定入稟，告港交所上市科總監簡嘉穎疏忽同失職，要畀個警號港交所喎！
大凌小股東告港交所唔畀復牌，都唔係新鮮事。早幾個月，內地小股東周本菊就入稟小額錢債審裁處，索償3萬幾蚊，單官司到家都未開審，胡生呢次個額咁大，睇怕有排等。
李華華